საპარლამენტო უმრავლესობის დეპუტატების ნაწილი, მათ შორის ეკა ბესელია და მისი მხარდამჭერები მოსამართლეების უვადოდ დანიშვნის შეჩერების მოთხოვნით საქართველოს პარლამენტში საკანონმდებლო ინიციატივას დაარეგისტრირებენ. ამის შესახებ ეკა ბესელიამ საქართველოს პარლამენტში განაცხადა.

მისი თქმით, საკანონმდებლო ინიციატივით უნდა შეჩერდეს მოსამართლეების გამწესება უვადოდ, პირველ და მეორე ინსტანციაზე ანუ საქალაქო და სააპელაციო სასამართლოში.

"საქართველოს კონსტიტუციის გარდამავალ დებულებებში სპეციალური მუხლია. ამ ჩანაწერით 2024 წლის 31 დეკემბრამდე ანუ 2025 წლამდე შეიძლება იუსტიციის საბჭომ არ გამოიყენოს უვადოდ დანიშვნა და პირველად გამწესების შემთხვევაში მოხდეს 3-წლიანი გამოსაცდელი ვადის გამოყენება.

"ამ ინიციატივით უნდა შეჩერდეს მოსამართლეთა უვადოდ დანიშვნა და პარალელურად უნდა დავიწყოთ ორგანულ კანონში ცვლილებებზე მუშაობა, რათა ღიად დარჩენილი სამართლებრივი საკითხები მოწესრიგდეს", — განაცხადა ეკა ბესელიამ.

აღნიშნულ ინიციატივას ხელს აწერენ დეპუტატები: ეკა ბესელია, გედევან ფოფხაძე, ლევან გოგიჩაიშვილი, დავით ჭიჭინაძე, ოთარ ჩრდილელი, ლევან კობერიძე, კობა ნარჩემაშვილი.

საკანონმდებლო ინიციატივის ავტორები ფიქრობენ, რომ უმრავლესობა ამ კანონპროექტს მხარს დაუჭერს.