ევროკომისია თავის მეორე ანგარიშში, რომელიც დღეს, 19 დეკემბერს გამოქვეყნდა, საბოლოო ჯამში დადებითად აფასებს საქართველოს მიერ კორუფციის წინააღმდეგ გადადგმულ ნაბიჯებს, თუმცა წერს, რომ მაღალი დონის კორუფცია კვლავ საჭიროებს გამოსწორებას.

ევროკომისიამ ევროპარლამენტისა და ევროკავშირის საბჭოსთვის მეორე ანგარიში უვიზო რეჟიმის შეჩერების მექანიზმის ფარგლებში მოამზადა.

"სავიზო ლიბერალიზაციის კრიტერიუმები სრულდება. კონკრეტული ზომები გატარდა არალეგალური მიგრაციის შესაკავებლად, თუმცა, ამასთან, საჭიროა შემდგომი დაუყოვნებლივი ქმედებები, ისეთი პრობლემების გადასაჭრელად, როგორიცაა, თავშესაფრის მოთხოვნის განაცხადების გაზრდილი რაოდენობა", — წერია ანგარიშში.

ევროკომისია მიიჩნევს, რომ საჭიროა შემდგომი ქმედებები საქართველოს მხრიდან:

  • გაძლიერდეს ოპერატიული თანამშრომლობა დაინტერესებულ ქვეყნებთან, საქართველოს მოქალაქეების მხრიდან თავშესაფრის მოთხოვნის შესამცირებლად;
  • გაძლიერდეს სასაზღვრო კონტროლი ფუნდამენტური უფლებების სრული გათვალისწინებით;
  • უვიზო მიმოსვლასთან დაკავშირებით გაგრძელდეს საინფორმაციო კამპანიების ორგანიზება;
  • კიდევ უფრო გაძლიერდეს ტრანსსასაზღვრო სამართალდაცვითი თანამშრომლობა საქართველოდან ორგანიზებულ დანაშაულებრივ დაჯგუფებებთან საბრძოლველად;
  • ანალიზზე დაფუძნებული საპოლიციო საქმიანობის რეფორმა უნდა დასრულდეს და დანაშაულის ანალიზის ერთიანი სისტემა ჩამოყალიბდეს;
  • უნდა გაგრძელდეს ანტიკორუფციული ჩარჩოს გაძლიერება, მათ შორის, აქტივების აღდგენის დამოუკიდებელი სამსახურის შექმნის გზით.

ევროკომისიის ანგარიშში ნათქვამია, რომ 2018 წლის პირველ ნახევარში შენგენის ქვეყნებში საქართველოს მოქალაქე თავშესაფრის მაძიებელთა რიცხვი გაორმაგდა, წინა წლის ანალოგიურ პერიოდთან შედარებით.

ევროპის საზღვრისა და სანაპირო დაცვის სააგენტოს მონაცემებით, 2017 წლის პირველ ნახევრიდან 2018 წლის პირველ ნახევრამდე, საზღვრის კვეთაზე უარისა და არალეგალად დარჩენის შემთხვევები გაიზარდა.