ინციდენტების პრევენციისა და მათზე რეაგირების მექანიზმის შეხვედრებზე, დეფაქტო ხელისუფლების დელეგაციის ხელმძღვანელი ეგორ კოჩიევი აცხადებს, რომ შეხვედრაზე "საზღვრის გავლების" საკითხს შეეხნენ. ამის შესახებ სააგენტო რეს იუწყება.

"როგორც წინა შეხვედრებზე, ქართულმა მხარემ მიუთითა რომ ეს პოლიტიკური საკითხია. ჩვენ ვეცადეთ აგვეხსნა, რომ ეს საკითხი წმინდად პრაქტიკული მნიშვნელობისაა, ადამიანების ცხოვრების გასაიოლებლად. მათ უნდა იცოდნენ, სად არის სამხრეთ ოსეთი და სად — საქართველო. ამ შემთხვევაში აღარ იქნება ყველა ის სანქცია თუ ჯარიმა, რაც დაკავებულებს ეკისრებათ", — ამბობს კოჩიევი.

ერგნეთის შეხვედრაზე ქართულმა მხარემ კვლავ მოითხოვა არჩილ ტატუნაშვილის შინაგანი ორგანოების გადმოცემის და დავით ბაშარულის მკვლელობის საქმეების დეტალების განხილვა. დღევანდელ შეხვედრაზე საოკუპაციო გამყოფ ხაზთან მომხდარი ინციდენტებიც განიხილეს. განხილვის თემა იყო, საზღვრის უკანონო გავლების პროცესის განახლების გამო გამართული საპროტესტო აქციები სოფელ ატოცში.

დღეს, 18 დეკემბერს, ერგნეთში ინციდენტების პრევენციისა და მათზე რეაგირების მექანიზმის სამუშაო ჯგუფის შეხვედრა 3-თვიანი პაუზის შემდეგ გაიმართა. მანამდე, 14 სექტემბრის შეხვედრაზე დე ფაქტო ხელისუფლების წარმომადგენლებმა შეხვედრის დღის წესრიგიდან არჩილ ტატუნაშვილის და დავით ბაშარულის საკითხების ამოღება მოითხოვეს. ქართული მხარის უარის შემდეგ მათ პროტესტის ნიშნად შეხვედრა დატოვეს.