ბრექსიტის გეგმაზე უთანხმოების გამო ბრიტანეთის კიდევ ორი მინისტრი გადადგა. შრომისა და პენსიის მინისტრი, ესტერ მაკვეი მალევე გადადგა მას შემდეგ, რაც ტერეზა მეის კაბინეტი ბრექსიტის საკითხების სახელმწიფო მინისტრმა, დომინიკ რააბამ დატოვა.

გარდა ამისა თანამდებობიდან გადადგა ბრექსიტის საკითხების უმცროსი მინისტრი, სუელა ბრავერმანი. მისი თქმით, აღნიშნული გეგმა ღალატია. სამივე გადამდგარი მინისტრი ბრექსიტის მხარდამჭერი იყო.

დომინიკ რააბი ბრექსიტის საკითხების მეორე მინისტრია, რომელიც წელს გადადგა. ივლისში ტერეზა მეის გეგმასთან შეუთანხმებლობის გამო გადადგა დევიდ დევისი. შემდეგ კი გადადგა საგარეო საქმეთა მინისტრი ბორის ჯონსონი.

დომინიკი რააბის წერილში საუბარია, რომ მას არ შეუძლია გეგმას მხარი დაუჭიროს, პირველ რიგში ჩრდილოეთ ირლანდიის განსაკუთრებული სტატუსის გამო, რომელიც, მისი თქმით, დიდი ბრიტანეთის ტერიტორიულ მთლიანობას უქმნის საფრთხეს.

დიდი ბრიტანეთიც და ევროკავშირიც მიიჩნევენ, რომ ირლანდიის რესპუბლიკასა და ჩრდილოეთ ირლანდიას შორის სრულყოფილი საზღვარი არ უნდა არსებობდეს, რაც პასპორტის კონტროლსა და მკაცრ შემოწმებას გულისხმობს.

რამდენიმე საათით ადრე დიდი ბრიტანეთის მთავრობამ გეგმის პროექტს მხარი დაუჭირა. მანამდე კი ამ პროექტზე შეთანხმდნენ ტერეზა მეი და ევროკავშირი.

დიდი ბრიტანეთი ევროკავშირიდან საბოლოოდ 2019 წლის 29 მარტს უნდა გამოვიდეს. დოკუმენტის პროექტში საუბარია 21-თვიან გარდამავალ პერიოდზე და ე.წ. გაყრის კანონპროექტის დეტალებზე, რომლის მიხედვითაც ბრიტანეთმა ევროკავშირს 39 მილიარდი ფუნტ სტერლინგი უნდა გადაუხადოს.