ხუთსაათიანი მოლაპარაკებების შემდეგ დიდი ბრიტანეთის მთავრობამ ბრექსიტის გეგმის პროექტს მხარი დაუჭირა.

"ეს ის შეთანხმებაა, რომელიც ფულის, კანონისა და საზღვრის კონტროლის საშუალებას ილზევა", - განაცხადა პრემიერ-მინისტრმა, ტერეზა მეიმ შეხვედრის შემდეგ. მისივე თქმით, ეს ქვეყნისთვის ერთადერთი კარგი ვარიანტია.

მეიმ აღნიშნა, რომ ხუთშაბათს, 15 ნოემბერს შეთანხმების შინაარსთან დაკავშირებით პარლამენტში სიტყვით გამოვა.

13 ნოემბერს დიდი ბრიტანეთი და ევროკავშირი ბრექსიტის გეგმის პროექტზე შეთანხმდნენ. დიდი ბრიტანეთი ევროკავშირიდან საბოლოოდ 2019 წლის 29 მარტს უნდა გამოვიდეს. დოკუმენტის პროექტში საუბარია 21-თვიან გარდამავალ პერიოდზე და ე.წ. გაყრის კანონპროექტის დეტალებზე, რომლის მიხედვითაც ბრიტანეთმა ევროკავშირს 39 მილიარდი ფუნტ სტერლინგი უნდა გადაუხადოს.

გარდა ამისა, უთანხმოების ერთ-ერთი მთავარი საკითხი იყო ჩრდილოეთ ირლანდიისა და ირლანდიის რესპუბლიკის საზღვარი. მხარეები ვერ თანხმდებოდნენ ბრექსტისის შემთხვევაში როგორ აეცილებინათ საზღვარზე ფიზიკური შემოწმება.

დიდი ბრიტანეთიც და ევროკავშირიც მიიჩნევენ, რომ ირლანდიის რესპუბლიკასა და ჩრდილოეთ ირლანდიას შორის სრულყოფილი საზღვარი არ უნდა არსებობდეს, რაც პასპორტის კონტროლსა და მკაცრ შემოწმებას გულისხმობს. იმ შემთხვევაში თუ მხარეები შეთანხმებას ვერ მიაღწევენ, ეს საზღვარი ფაქტობრივად გახდება საზღვარი ევროკავშირსა და დიდ ბრიტანეთს შორის.

რამდენიმე პარლამენტარის მოწოდების მიუხედავად ტერეზა მეი აცხადებდა, რომ ბრექსიტის საკითხზე მეორე რეფერენდუმი არ ჩატარდება. თუ მხარეები საბოლოო შეთანხმებას მიაღწევენ, ის დაამტკიცონ ევროპარლამენტმა და ბრიტანელმა კანონმდებლებმა.