პროკურატურამ ყოფილ მთავარ პროკურორთან, ოთარ ფარცხალაძესთან ერთად ფინანსური პოლიციის ყოფილ თანამშრომელს, მიხეილ ჩოხელსაც ცემის მუხლით წაუყენა ბრალი. აღკვეთის ღონისძიების სახით, ფარცხალაძის მსგავსად, მასაც 5 000-ლარიანი გირაო განესაზღვრა სასამართლო სხდომაზე, რომელიც გუშინ, 5 ნოემბერს "სასწრაფო წესით" ჩაინიშნა. ბრალის წარდგენიდან რამდენიმე საათში, საღამოს 8 საათზე სასამართლომ ისე იმსჯელა, რომ ამის შესახებ მეორე დღემდე ვერავინ გაიგო.

2017 წლის მაისში მიხეილ ჩოხელმა ფინანსთა სამინისტროს საგამოძიებო სამსახურში დაკავებული პოსტი დატოვა. იგი საგამოძიებო დეპარტამენტის უფროსის მოადგილე იყო. მან ეს კლუბ ელცენტროში მომხდარი ინციდენტით ახსნა. 2017 წლის 17 მაისს კლუბში ჩოხელი ლაშა თორდიასთან ერთად იყო. მისი განმარტებით, გამომდინარე იქიდან, რომ ის ინციდენტის მონაწილეა, იმისათვის, რომ ფინანსთა სამინსიტროს საგამოძიებო სამსახურს ჩრდილი არ მიადგეს – თანამდებობას ტოვებს.

მიხეილ ჩოხელის ინციდენტში მონაწილეობის საკითხით დაინტერესებისკენ პროკურატურას ადამიანის უფლებათა ცენტრიც მოუწოდებდა. ცენტრის იურისტებმა დღეს, 6 ნოემბერს გამართულ პრესკონფერენციაზე თქვეს, რომ ფინანსური პოლიციის მაღალჩინოსანი, მიხეილ ჩოხელიც მონაწილეობდა.

ლაშა თორდიას ცემის საქმე

2017 წლის 12 მაისს სახელმწიფო აუდიტის სამსახურის ხელმძღვანელს, ლაშა თორდიას თავს დაესხნენ. თორდია თავდასხმაში ყოფილ პროკურორ ფარცხალაძეს ადანაშაულებდა.

თორდიას მიაჩნდა, რომ თავდასხმა მისი სამსახურის მიერ ყოფილი პროკურორის შესახებ მასალების მოგროვებას უკავშირდებოდა. გენერალური აუდიტი ამბობდა, რომ ფარცხალაძეს დაუსჯელობის განცდა აქვს.

ბრალდებების პასუხად, ფარცხალაძემ განაცხადა, რომ გენერალური აუდიტი იტყუებოდა და კონფლიქტის ინიციატორი თავადვე იყო. მისი თქმით, თორდია მთვრალ მდგომარეობაში იმყოფებოდა და ხელი პირველად მან მოიქნია.

"როგორც ჩანს, მას გულში აქვს ჩარჩენილი ჩემი გარკვეული ქმედებები სამართალდამცავ უწყებებში ჩემს საქმიანობასთან დაკავშირებით, რაზეც შესაბამის ინფორმაციას მივაწვდი გამოძიებას", — ამბობდა ფარცხალაძე. თუმცა, მომხდარიდან 4 დღის განმავლობაში ის დაკითხვაზე არ დაიბარეს. უწყებაში ამბობდნენ, რომ გამოძიების პრეროგატივა იყოს ის, თუ როდის დაჰკითხავდნენ ყოფილ პროკურორს.

2017 წლის 16 მაისს ფარცხალაძის დაკითხვისკენ პროკურატურას პარლამენტის თავმჯდომარემ მოუწოდა. 17 მაისს ყოფილი პროკურორი დაკითხეს.

ფარცხალაძის გამოკითხვიდან ერთ კვირაში, 24 მაისს სოციალურ ქსელში ლაშა თორდიას სხვა ინციდენტის ამსახველი კადრები გავრცელდა. თორდია და არასამთავრობოები აცხადებდნენ, რომ კადრების გავრცელება საეჭვოდ დაემთხვა ფარცხალაძესთან ინციდენტს და ის დამოუკიდებლად უნდა გამოეძიებინათ.

საქართველოს შინაგან საქმეთა სამინისტრომ აღნიშნული ინციდენტის გამოძიების შუალედური შედეგები გამოაქვეყნა. უწყების ინფორმაციით, ნეიტრალური მოწმეების გამოკითხვით დადგინდა, რომ ინციდენტის დროს პირველმა ხელი ლაშა თორდიამ მოიქნია და არა ფარცხალაძემ.