არასამთავრობო ორგანიზაციების ნაწილს მიაჩნია, რომ კაფე-ბარ "პ.ა.მ კლუბში" გენერალურ აუდიტორთან დაკავშირებული ინციდენტის ამსახველი ვიდეომასალის გავრცელება საეჭვოდ ემთხვევა ლაშა თორდიასა და ოთარ ფარცხალაძის შორის მომხდარ ინციდენტზე დაწყებულ გამოძიებას და შესაძლოა, ამ შემთხვევის აქტუალურობის გადაფარვის მცდელობას ისახავდეს მიზნად:

"სამწუხაროდ, მსგავსი ეჭვები წარსულშიც არაერთხელ გაჩენილა, ეს კი შესაძლოა, სამართალდამცავი სისტემის მუშაობის მანკიერ მეთოდებზე მიუთითებდეს. ამასთან გაუგებარია, როგორ მოხდა გამოძიების ხელთ არსებული ვიდეო მასალის გასაჯაროება. დამატებით ეჭვებს აჩენს ოთარ ფარცხალაძის მიერ მიმდინარე წლის 14 მაისს გაკეთებული განცხადება, სადაც ის ლაშა თორდიას "შეუფერებელ" ქცევაზე მიუთითებს. აღნიშნული განცხადება აჩენს საფუძვლიან ეჭვებს, რომ ოთარ ფარცხალაძემ წინასწარ იცოდა ვიდეო მასალის არსებობის შესახებ. ამგვარი განცხადების გავრცელება კი შესაძლოა ასევე შეფასდეს მთავარი აუდიტორის დაშინებისა და მასზე ზემოქმედების მცდელობად."

განცხადების ხელმომწერი არასამთავრობო ორგანიზაციები

არასამთავრობოები ხაზს უსვამენ, რომ აუდიტის სამსახურის ხელმძღვანელსა და ოთარ ფარცხალაძეს შორის მომხდარი ინციდენტი არავითარ კავშირში არ არის გავრცელებულ ვიდეო კადრებთან და ორივე შემთხვევა დამოუკიდებლად უნდა იქნას გამოძიებული.

აღნიშნული ვიდეომასალის გავრცელებას ფარცხალაძესთან ინციდენტს უკავშირებს თავად გენერალური აუდიტორი, ლაშა თორდიაც.

ამ ვიდეოკადრების გავრცელებას წინ უსწრებდა საქართველოს მთავარ პროკურორს, ოთარ ფარცხალაძესა და ლაშა თორდიას შორის ინციდენტი. თორდიას ინციდენტს თავის სამსახურებრივ საქმიანობას უკავშირებს და ამბობს, რომ პირველმა ფარცხალაძემ დაარტყა.