შინაგან საქმეთა სამინისტო ყოფილი მთავარი პროკურორის, ოთარ ფარცხალაძის დაკითხვასთან დაკავშირებით აცხადებს, რომ იგი ჯერ არ დაუკითხავთ და "გამოძიების პრეროგატივაა, თუ როდის დაკითხავენ". მათივე ცნობით, ამ დროისთვის მიმდინარეობს ინტენსიური საგამოძიებო მოქმედებები. შინაგან საქმეთა სამინისტროში გამოძიება სისიხლის სამართლის კოდექსის 126-ე მუხლის პირველი ნაწილით მიმდინარეობს, რაც ცემას გულისხმობს. სამართალდამცავებმა, ინციდენტიდან მალევე დაკითხეს ლაშა თორდია.

გენერალური აუდიტორი ლაშა თორდია აცხადებს, რომ 12 ივნისს მას ფიზიკური შეურაცხყოფა მიაყენა ოთარ ფარცხალაძემ და მისმა თანხმლებმა პირმა. თორდიას თქმით კი, ამის მიზეზი აუდიტის სამსახურის მიერ ფარცხალაძის შესახებ ანგარიშის მომზადება გახდა:

"ბევრი იყვენენ, დაახლოებით ხუთი ადამიანი იყო. ამ ხუთმა ადამიანმა დარტყმის შემდგომ, ყველამ დაიწყო უკვე თავდასხმა. ოთარ ფარცხალაძემ დაიწყო და ისიც ჩხუბობდა პირადად ამ პროცესში".

ოთარ ფარცხალაძის თქმით, თორდიას ბრალდებები სიცრუეა და კონფლიქტის ინიციატორი თავად გენერალური აუდიტორი იყო.

დღეს, 16 მაისს, ფარცხალაძის ადვოკატმა, მერაბ ჩიქოვანმა ბრიფინგზე ისაუბრა, რომ ლაშა თორდიას მიერ გავრცელებული ინფორმაცია, თავდასხმის შესახებ, მცდარია და მის მიერ მოპოვებული ინფორმაციით, მხოლოდ მცირე ინციდენტი მოხდა, რაშიც ფარცხალაძე არ მონაწილეობდა.