საქართველოს მთავარ პროკურატურაში ამბობენ, რომ აღარ უნდა არსებობდეს კითხვის ნიშნები იმასთან დაკავშირებით დაიკითხება თუ არა ყოფილი პროკურორი, ოთარ ფარცხალაძე სხვა გახმაურებულ საქმეებზე. ამის არგუმენტად პროკურატურაში მოჰყავთ ის ფაქტი, რომ "ასეთ პიროვნებას" უკვე წარუდგინეს ბრალდება ერთ საქმეზე.

პროკურატურაში დაადასტურეს, რომ ფარცხალაძე ამ დრომდე არ დაკითხულა ომეგა ჯგუფის საქმეზე. მათი განმარტებით, ეს გამოძიების ინტერესებიდან გამომდინარე მოხდა. თუმცა მათივე თქმით, ის აუცილებლად გამოიკითხება.

"ვადასტურებ, რომ გამოძიებისათვის არ არსებობენ ხელშეუხებელი პიროვნებები და ყველა ის პირი გამოიკითხება, ყველა საჭირო მტკიცებულება იქნება მოპოვებული, რაც გამოძიებას შეუწყობს ხელს", — განაცხადა პროკურორმა, ემზარ გაგნიძემ.

ყოფილ პროკურორ ოთარ ფარცხალაძეს ბრალი გენერალური აუდიტორის, ლაშა თორდიას ცემის საქმეზე წარედგინა. პროკურატურის მოთხოვნით მას 5000 ლარიანი გირაო შეუფარდეს.

ორგანიზაცია ადამიანის უფლებათა ცენტრი, რომელიც ყოფილი ლაშა თორდიას ინტერესებს იცავს, აპროტესტებს, რომ საქმეზე გამოძიება სისხლის სამართლის კოდექსის 126-ე, ცემის მუხლით მიმდინარეობს.

მათი თქმით, საქმის გამოძიება უნდა მიმდინარეობდეს სისხლის სამართლის კოდექსის 353-ე პრიმა მუხლით, რაც გულისხმობს სახელმწიფო ხელისუფლების წარმომადგენელზე თავდასხმას მისი საქმიანობის გათვალისწინებით. მათივე თქმით, თორდიას დღეს, 6 ნოემბერს პროკურატურამ უკვე მიანიჭა დაზარალებულის სტატუსი.

გენერალური აუდიტის ცემის გარდა ფარცხალაძის სახელი ფიგურირებს ომეგა ჯგუფისა და ვანო მერაბიშვილის საკნიდან გაყვანის საქმეში.

ომეგა ჯგუფის საქმე — სარდაფის ეპიზოდი

2018 წლის 10 სექტემბერს რუსთავი 2-მა გაავრცელა ჩანაწერები, რომლებშიც, სავარაუდოდ, სპორტის ყოფილი მინისტრი ლევან ყიფიანი ომეგა ჯგუფის დამფუძნებელს, ზაზა ოქუაშვილს ბიძინა ივანიშვილის დეიდაშვილთან, უჩა მამაცაშვილთან საუბრის დეტალებს უყვება. ჩანაწერში ისმის, რომ მამაცაშვილი ომეგა ჯგუფის პრობლემების მოსაგვარებლად, მთავრობასთან მოლაპარაკებას აწარმოებდა და ამ თემაზე პრემიერთან შეხვედრასაც გეგმავდა.

მოგვიანებით, რუსთავი 2-მა კიდევ ერთი ჩანაწერი გაავრცელა, სადაც სავარაუდოდ, ლევან ყიფიანი და ზაზა ოქუაშვილი ხელისუფლებასთან გარიგებაზე საუბრობენ. სავარაუდოდ, ლევან ყიფიანი ამბობს, რომ ყოფილი პროკურორი ოთარ ფარცხალაძე ლევან ყიფიანს ემუქრებოდა. რუსთავი 2-ის ცნობით, ფარცხალაძე ყიფიანს ფიზიკურად ერთ-ერთ სარდაფში გაუსწორდა და გაუპატიურებით ემუქრებოდა.

ტელეკომპანიის მიერ გავრცელებული ინფორმაცია, მოგვიანებით, ამავე არხზე ომეგა ჯგუფის დამფუძნებელმა, ზაზა ოქუაშვილმა დაადასტურა. ოქუაშვილის თქმით, ლევან ყიფიანს ამ შემთხვევის შემდეგ თვითმკვლელობაც კი უნდოდა.

ომეგა ჯგუფის საქმეზე ლევან ყიფიანმა პროკურატურას 9 სექტემბერს ჩვენება მისცა. დაკითხვა 18 საათი გაგრძელდა. დაკითხვის ოქმის მიხედვით, ყოფილმა მინისტრმა ისაუბრა მედიაში გავრცელებულ მასალაზე და განაცხადა, რომ ეს ჩანაწერები ოქუაშვილთან ერთად უცხოელი პარტნიორებისთვის დადგა. მანვე განმარტა, რომ აუდიოჩანაწერები დამონტაჟებულია.

ოქმის მიხედვით, "სარდაფის ეპიზოდში" ლევან ყიფიანი ოთარ ფარცხალაძესთან კონფლიქტს, "თრილერს" და "სრულ სისულელეს" უწოდებს. ყიფიანი ირწმუნება, რომ ფარცხალაძესთან მეგობრული ურთიერთობა აქვს.

რუსთავი 2-მა მოგვიანებით ვიდეოჩანაწერი გაასაჯაროვა, სადაც, სავარაუდოდ, ლევან ყიფიანი "სარდაფის" იმ ეპიზოდზე საუბრობდა, რომელიც პროკურატურაში დაკითხვის დროს უარყო. პროკურატურაში ყიფიანზე სავარაუდო გაუპატიურების მუქარის საქმეზე გამოძიება არ დაწყებულა.