აზერბაიჯანის პრეზიდენტმა ევროპული ინსტიტუტები მიკერძოებაში დაადანაშაულა. მან ამის შესახებ 15 სექტემბერს ბაქოში, მუსლიმური რელიგიური ორგანიზაციების წარმომადგენლებთან და საერთაშორისო კონფერენციის მონაწილეებთან შეხვედრაზე ისაუბრა. ალიევმა სომხეთთან 30-წლიან კონფლიქტზე გაამახვილა ყურადღება და განაცხადა, რომ ევროპის საბჭო მიკერძოებულად იღებდა აზერბაიჯანთან დაკავშირებით გადაწყვეტილებებს.

"30 წლის განმავლობაში ყველა ევროპულ ორგანიზაციაში ვაჟღერებდით ჩვენს ხმას და ვცდილობდით, სიმართლე მიგვეტანა მათამდე. პირადად მე, ჯერ კიდევ 2001 წელს, როდესაც აზერბაიჯანი ევროპის საბჭოს საპარლამენტო ასამბლეის წევრი გახდა, მილი მეჯლისის დეპუტატი ვიყავი და აზერბაიჯანის დელეგაციას ვხელმძღვანელობდი. როდესაც ჩვენი დელეგაცია იქ ჩავიდა, პირველი საკითხი, რომელიც დავაყენეთ, იყო მოთხოვნა, რომ ამ უსამართლობისთვის ბოლო მოეღოთ.

რას ვითხოვდით? არ ვითხოვდით, რომ ევროპის საბჭო წასულიყო და სომხეთის წინააღმდეგ ებრძოლა. ვითხოვდით პოლიტიკური გადაწყვეტილების მიღებას — აგრესორს აგრესორი დარქმეოდა. პოლიტიკური გადაწყვეტილების მიღება, ფაქტობრივად, პოლიტიკურ შეფასებას ნიშნავს. ამის გაკეთება არ ისურვეს. პოლიტიკური შეფასება არ გაკეთებულა. პირიქით, ცილს გვწამებდნენ და ჩვენს რეპუტაციას ლახავდნენ. ეს დღესაც გრძელდება.

შეხედეთ, ახლა, როდესაც აზერბაიჯანი ძლიერდება და სრულად ახდენს საკუთარი პოტენციალის მობილიზებას, მის წინააღმდეგ კვლავ მიმდინარეობს ბინძური კამპანია დასავლურ მედიაში. ანუ ცდილობენ ჩვენს დისკრედიტაციას — ყოველდღიურად ქვეყნდება სტატიები, რომლებიც აზერბაიჯანის შესახებ სიცრუეს, ცილისწამებასა და შეურაცხმყოფელ ბრალდებებს შეიცავს.

ევროპის საბჭოს სომხეთისთვის სანქციები არ დაუწესებია. მაგრამ როდესაც 2023 წლის სექტემბერში ყარაბაღი სრულად გავათავისუფლეთ, სეპარატიზმი აღმოვფხვერით და სეპარატისტები დავაკავეთ, სულ რაღაც ოთხი თვის შემდეგ ევროპის საბჭომ სანქციები ჩვენ დაგვიწესა. შეხედეთ, ეს მათი ნამდვილი სახეა.

ევროპარლამენტი კორუმპირებული ფიგურების ბუდეა. ამას სრული პასუხისმგებლობით ვაცხადებ: ევროპარლამენტი კორუმპირებული ფიგურების ბუდეა. მისი ვიცე-პრეზიდენტის სახლში მილიონობით დოლარი ნაღდი ფული აღმოაჩინეს, შემდეგ კი მთელი ეს საქმე ისე მიჩქმალეს, თითქოს არაფერი მომხდარა. მისი სახელი ცნობილია — ის ევროპარლამენტის ბერძენი წევრია. რამდენი წელი გავიდა მას შემდეგ? მის წინააღმდეგ რაიმე ზომა მიიღეს? არა. პასუხისგებაში მისცეს? არა. გაათავისუფლეს. შეხედეთ, ევროპარლამენტი სწორედ ასეთი ისლამოფობებისგან შედგება და ეს საკითხი მუდმივი ყურადღების ცენტრში უნდა დარჩეს.

ჩვენი რელიგიისა და ისლამური სამყაროს წინააღმდეგ გამოუცხადებელი ომი მიმდინარეობს, ხოლო ისლამოფობია ამ ომის მხოლოდ მცირე ნაწილია. მუსლიმური სამყაროს დისკრედიტაცია, მისი იმიჯის შელახვა, ტერორიზმთან გაიგივება და ჩვენი ღირებულებებისა და წმინდა ყურანის შეურაცხყოფა — როგორ ფიქრობთ, ეს ყველაფერი შემთხვევით ხდება? არა. ეს მიზანმიმართული და გააზრებული პოლიტიკაა", — განაცხადა ილჰამ ალიევმა.