ტელეკომპანია რუსთავი 2-ის ინფორმაციით, ყოფილი პროკურორი ოთარ ფარცხალაძე სპორტის ყოფილ მინისტრს ლევან ყიფიანს გაუპატიურებით ემუქრებოდა. რუსთავი 2-ის ცნობით, ფარცხალაძე ყიფიანს ფიზიკურად ერთ-ერთ სარდაფში გაუსწორდა. ტელეკომპანიის მიერ გავრცელებული ინფორმაცია მოგვიანებით რუსთავი 2-თან მიცემულ ინტერვიუში ომეგა ჯგუფის დამფუძნებელმა ზაზა ოქუაშვილმაც დაადასტურა. ოქუაშვილის თქმით, ლევან ყიფიანს ამ შემთხვევის შემდეგ თავის მოკვლაც კი უნდოდა.

რუსთავი 2-ის ინფორმაციით, საქმე ეხება ე.წ. ომეგას საქმეს, სადაც ბიძინა ივანიშვილის დავალებას ოთარ ფარცხალაძე ასრულებს.

ტელეკომპანიის ცნობით, ჯერ კიდევ 2004 წელს ქვეყნიდან წასული ზაზა ოქუაშვილი ახალი ხელისუფლების პირობებში ბრუნდება საქართველოში. იგი ხვდება ბიძინა ივანიშვილს, რომელსაც უყვება თავისი ბიზნესის პრობლემების შესახებ.

P.S-ის წამყვანი ანონიმურ წყაროზე დაყრდნობით ყვება, რომ ივანიშვილი მას დახმარებას ჰპირდება. ამის შემდეგ ზაზა ოქუაშვილთან კონტაქტზე გადის ყოფილი მთავარი პროკურორი, ოთარ ფარცხალაძე. ოთარ ფარცხალაძე მას ეუბნება, რომ მისი ბიზნესპრობლემების მოსაგვარებლად ოქუაშვილმა უნდა გადაიხადოს ე.წ. კონტრიბუცია - 4 მილიონი.

ოქუაშვილი იხსენებს, რომ ეს საუბარი ძალიან მშვიდ ვითარებაში მიმდინარეობდა, თუმცა ფარცხალაძე გარშემორტყმული იყო შეიარაღებული ადამიანებით და მათი უმრავლესობა - თავად ყოფილი მთავარი პროკურორიც დიდი ალბათობით, ნარკოტიკის ზემოქმედების ქვეშ იმყოფებოდნენ.

მათივე ინფორმაციით, ზაზა ოქუაშვილი ფარცხალაძეს ეუბნება, რომ მას ურჩევნია, უშუალოდ ივანიშვილთან გააგრძელოს მოლაპარაკება, რაზეც ფარცხალაძე პასუხობს, რომ ის წარმოადგენს სწორედ ბიძინა ივანიშვილს, რომ ის არის ივანიშვილის შუამავალი. ამ თემებზე საუბარი, რუსთავი 2-ის მიერ გავრცელებულ ახალ ჩანაწერში სპორტის ყოფილ მინისტრსა და ზაზა ოქუაშვილს შორის მიმდინარეობს.

რუსთავი 2-ის ცნობით, მათ მიერ მოპოვებული ჩანაწერები ფარცხალაძესა და ყიფიანს შორის არსებულ დაპირისპირებას ადასტურებს.

აღნიშნულ ჩანაწერში თითქოსდა ზაზა ოქუაშვილი რამდენჯერმე უხსენებს სავარაუდოდ, ყიფიანს სარდაფის ინციდენტს, რომელსაც თავად ყიფიანი არ უარყოფს. ყოფილი სპორტის მინისტრი ჩანაწერის ზოგიერთ მონაკვეთში აღნიშნულ ინციდენტს "ავარიად" მოიხსენიებს.