რუსთავი 2 ომეგა ჯგუფის საქმეზე ვიდეოჩანაწერს ასაჯაროებს, სადაც, სავარაუდოდ, სპორტის ყოფილი მინისტრი, ლევან ყიფიანი "სარდაფის" იმ ეპიზოდზე საუბრობს, რომელიც აუდიოჩანაწერების გავრცელების შემდეგ, პროკურატურაში დაკითხვის დროს უარყო.

ვიდეოში, სავარაუდოდ, ყიფიანი, სავარაუდოდ, ომეგა ჯგუფის ხელმძღვანელ, ზაზა ოქუაშვილს და ომეგა ჯგუფის ერთ-ერთ თანამშრომელ დავით თოლორდავას ესაუბრება და ამბობს, რომ ყოფილ პროკურორ ოთარ ფარცხალაძესთან დაპირისპირება მოუვიდა. მისი თქმით, მან ფარცხალაძეს შეაგინა, რის გამოც ფარცხალაძის სარდაფში გალახეს.

ვიდეოს მიხედვით, ყიფიანი ამბობს, რომ ფარცხალაძის სარდაფში მოსასმენი აპარატურის ძებნისას გააშიშვლეს. მისივე თქმით, ეს საქმე "მოგვარდა" და ის და ფარცხალაძე ქართული ოცნების თავმჯდომარემ, ბიძინა ივანიშვილმა შეარიგა.

ვიდეოჩანაწერის გავრცელების შემდეგ On.ge-მ ლევან ყიფიანის ადვოკატთან დაკავშირება სცადა, თუმცა, მან სატელეფონო ზარებს არ უპასუხა.

"სარდაფის ეპიზოდი"

30 სექტემბერს ტელეკომპანია რუსთავი 2-მა გაავრცელა აუდიოჩანაწერი, სადაც, სავარაუდოდ, ოთარ ფარცხალაძე ლევან ყიფიანს გაუპატიურებით ემუქრებოდა. რუსთავი 2-ის ცნობით, ფარცხალაძე ყიფიანს ფიზიკურად ერთ-ერთ სარდაფში გაუსწორდა.

ტელეკომპანიის მიერ გავრცელებული ინფორმაცია, მოგვიანებით, ამავე არხზე ზაზა ოქუაშვილმა დაადასტურა. ოქუაშვილის თქმით, ლევან ყიფიანს ამ შემთხვევის შემდეგ თვითმკვლელობაც კი უნდოდა.

ომეგა ჯგუფის საქმეზე ლევან ყიფიანმა პროკურატურას 9 სექტემბერს ჩვენება მისცა. დაკითხვა 18 საათი გაგრძელდა. დაკითხვის ოქმის მიხედვით, ყოფილმა მინისტრმა ისაუბრა მედიაში გავრცელებულ მასალაზე და განაცხადა, რომ ეს ჩანაწერები ოქუაშვილთან ერთად უცხოელი პარტნიორებისთვის დადგა. მანვე განმარტა, რომ მედიით გავრცელებული აუდიოჩანაწერები დამონტაჟებულია.

ოქმის მიხედვით, "სარდაფის ეპიზოდში" ლევან ყიფიანი ოთარ ფარცხალაძესთან კონფლიქტს, "თრილერს" და "სრულ სისულელეს" უწოდებს. ყიფიანი ირწმუნება, რომ ფარცხალაძესთან მეგობრული ურთიერთობა აქვს.

პროკურატურაში ამბობენ, რომ ყიფიანზე სავარაუდო გაუპატიურების მუქარის საქმეს ცალკე არ იძიებენ. თავად სპორტის ყოფილი მინისტრი კი გეგმავს ზაზა ოქუაშვილს წინააღმდეგ სამოქალაქო სარჩელი შეიტანოს.