სპორტის ყოფილი მინისტრის, ლევან ყიფიანის ადვოკატი, შალვა ხაჭაპურიძე ამბობს, რომ ომეგა ჯგუფის საქმეზე მედიასაშუალებით გავრცელებულ ჩანაწერში მისი დაცვის ქვეშ მყოფის ხმა ისმის. თუმცა, როგორც ადვოკატი განმარტავს, აუდიოჩანაწერი დამონტაჟებულია და შეცვლილია კონტექსტი. მისივე თქმით, ჩანაწერები სხვადასხვა დროსაა გაკეთებული.

შალვა ხაჭაპურიძე, ასევე, აღნიშნავს, რომ მისი დაცვის ქვეშ მყოფს ომეგა ჯგუფის დამფუძნებელთან, ზაზა ოქუაშვილთან სამი წლის განმავლობაში ჰქონდა კონტაქტი:

"იგი მუშაობდა ოფიციალურად და ხელშეკრულება დადებულია, სადაც მითითებულია, რომ ის ვალდებული იყო ეწარმოებინა მოლაპარაკებები, როგორც ფიზიკურ, ისე სახელმწიფო და კერძო დაწესებულებებთან ამ კომპანიასთან წარმოშობილ გარკვეულ პრობლემებთან. ეს მისი მოვალეობა გახლდათ".

ომეგა ჯგუფის საქმეზე ლევან ყიფიანს დღეს, 3 ოქტომბერს სასამართლოში გამოკითხავენ. მისმა ადვოკატმა აღნიშნა, რომ საჯარო ინტერესებიდან გამომდინარე მათ გადაწყვიტეს ჩვენება სასამართლოსთვის მიეცათ:

"საკმაოდ სერიოზული ინფორმაციის მიწოდებას გეგმავს, რომელიც შეიტანს ახალ გარემოებებს საქმეში".

რაც შეეხება სარდაფის ეპიზოდს, ხაჭაპურიძე ამბობს, რომ ყოფილ პროკურორს, ოთარ ფარცხალაძესა და ლევან ყიფიანს მეგობრული ურთიერთობები ჰქონდათ. მისივე თქმით, სარდაფში ყიფიანის ცემასთან დაკავშირებით მისი დაცვის ქვეშ მყოფი თავად ისაუბრებს.