16 სექტემბერს ცხოველთა უფლებადამცველი თამაზ ელიზბარაშვილი გამომძიებელმა დაკითხა, რის შემდეგაც მან შიმშილობა შეწყვიტა — ამის შესახებ ადვოკატმა ლექსო სვიმონიშვილმა NEWS.On.ge-ს განუცხადა.

ელიზბარაშვილი ციხიდან გამოგზავნილ წერილებში გამომძიებლის მიერ დაკითხვას ითხოვდა იმ სისხლის სამართლის საქმეზე, რის გამოც დააკავეს.

"დღეს შიმშილობის მე-7 დღეა. ვიღაცას ალბათ გაუჩნდება კითხვა, რატომ შიმშილობს ეს კაციო? ვშიმშილობ მხოლოდ ერთი მოთხოვნის გამო: "დამკითხოს გამომძიებელმა". უკვე ორი კვირაა დაპატიმრებული ვარ და ჯერ არ დავუკითხივარ გამომძიებელს და იცით რატომ? იმიტომ, რომ ჩემი დაკითხვის შემდეგ ფარდა აეხდება ამ შეკერილ ცრუ საქმეს და დადგინდება სიმართლე და ჩემი უდანაშაულობა," — წერდა ელიზბარაშვილი 16 სექტემბერს გამოქვეყნებულ წერილში მანამ, ვიდრე მას დაკითხავდნენ.

ცხოველების უფლებადამცველი 13 სექტემბრით დათარიღებულ წერილში კი, ციხეში არასათანადო პირობებზე და დაკავებისას პოლიციის მხრიდან ძალადობაზე წერს.

"ჩემი წამება გაგრძელდა გლდანის ციხეში. ბუნებრივია უდანაშაულო კაცი იბრძვის სიმართლისათვის და 9 სექტემბერს გამოვაცხადე შიმშილი. გადამიყვანეს სამარტოო 53-ე საკანში, სადაც ფანჯარას მინები არ აქვს. არც ტელევიზორი, არც რადიო, არც საპონი, პირსაპარსი, სარკე, სავარცხელი, ფრჩხილის საჭრელი და არც მადუღარა. შიმშილის მე-4 დღეს, პატივი დამდეს და მადუღარა შემომიტანეს საკანში. მარტო წყალს ვსვამ, საკანში მხოლოდ ცივი წყალია და აი მადუღარით თბილი წყალი მიირთვიო," — წერს ელიზბარაშვილი [ტვ პირველი]

ცნობისთვის, 1-ელ სექტემბერს, დაახლოებით საღამოს 9 საათზე, ბიზნესმენი თამაზ ელიზბარაშვილი საკუთარ ბინაში ჩხრეკისას დააკავეს, მანამდე სამართალდამცავებმა ჩხრეკა ჩაატარეს მის ავტომობილში. როგორც პოლიციელები ადგილზე აცხადებდნენ, იარაღს ეძებდნენ. ამას კი წინ უძღოდა რესტორანში მომხდარი სიტყვიერი დაპირისპირება ელიზბარაშვილსა და 7 პირს შორის. პროკურატურის ცნობით, მომხდარი სიტყვიერი კონფლიქტის დროს, თამაზ ელიზბარაშვილი დაემუქრა დაზარალებულს და მასთან ერთად მყოფ პირებს.

4 სექტემბერს თბილისის საქალაქო სასამართლომ ცხოველების უფლებადამცველს და ბიზნესმენ თამაზ ელიზბარაშვილს აღმკვეთი ღონისძიების სახით პატიმრობა შეუფარდა.

9 სექტემბერს პატიმრობაში მყოფი ცხოველების უფლებადამცველმა თამაზ ელიზბარაშვილმა ციხიდან წერილი გაავრცელა, სადაც წერდა, რომ პროტესტის ნიშნად შიმშილობა დაიწყო და საზოგადოებას მხარდაჭერისკენ მოუწოდებდა.

თამაზ ელიზბარაშვილის საქმეზე ვრცლად იხილეთ აქ.