იუსტიციის მინისტრის მოადგილედ ლაშა მაღრაძე ხელახლა დაინიშნა. ამის შესახებ ინფორმაციას იუსტიციის სამინისტრო ავრცელებს. აღსანიშნავია, რომ ამ დრომდე მაღრაძე სუს-ში უფროსის პირველი მოადგილის პოსტს იკავებდა. მანამდე კი იუსტიციის მინისტრის მოადგილე.

როგორც უწყება იტყობინება, ლაშა მაღრაძე პროფესიით იურისტია. დამთავრებული აქვს ივანე ჯავახიშვილის სახელობის თბილისის სახელმწიფო უნივერსიტეტის იურიდიული ფაკულტეტი და კოლუმბიის უნივერსიტეტის სამართლის სკოლა.

"სხვადასხვა დროს მუშაობდა წამყვან თანამდებობებზე, როგორც საჯარო, ისე კერძო სექტორში;

აქვს 20-წლიანი გამოცდილება ისეთ სფეროებში, როგორიც არის: სისხლის სამართლის მართლმსაჯულება; სააღსრულებო სისტემა; სასამართლო სისტემა; სამოსამართლო სწავლება; ანტიკორუფციული, კანონის უზენაესობა და ადამიანის უფლებები. მართლმსაჯულების სექტორის ინსტიტუციური და პროგრამული რეფორმის განსახორციელებლად აქტიურად თანამშრომლობდა საერთაშორისო პარტნიორებთან.

იუსტიციის მინისტრის მოადგილის თანამდებობაზე დანიშვნამდე იკავებდა პირველი მოადგილის თანამდებობას სახელმწიფო უსაფრთხოების სამსახურში", — წერია იუსტიციის სამინისტროს პრესრელიზში.

უწყება არ განმარტავს ლაშა მაღრაძის სუს-დან იუსტიციის სამინისტროში გადაყვანის მიზეზს.

აღსანიშნავია, რომ ლაშა მაღრაძე მუშაობდა სპორტის სამინისტროს მინისტრის მოადგილედაც:

  • 2025 წლის თებერვლიდან აპრილამდე სპორტის მინისტრის მოადგილე;
  • 2025 წლის აპრილიდან სექტემბრამდე იუსტიციის მინისტრის მოადგილე;
  • 2025 წლის სექტემბრიდან 2026 წლის სექტემბრამდე სუს-ის უფროსის პირველი მოადგილე;
  • 2026 წლის სექტემბრიდან კვლავ იუსტიციის მინისტრის მოადგილე;