საფრანგეთის პრეზიდენტ ემანუელ მაკრონის განცხადებით, ნავთობზე არსებული ზეწოლა და ავტოგასამართ სადგურებზე გაზრდილი ფასები ფრანგი ხალხისთვის მძიმე ტვირთია. ამის შესახებ მან X-ზე დაწერა.

მისი თქმით, რეგიონში მიმდინარე პროცესები პირდაპირ აისახება მოქალაქეთა ყოველდღიურობაზე, რის გამოც საფრანგეთი აქტიურად მუშაობს დაძაბულობის შესამცირებლად და ენერგომომარაგების უსაფრთხოების გასაძლიერებლად.

ამასთან, მაკრონმა აღნიშნა, რომ ერაყის პრემიერმინისტრთან გამართული კონსულტაციების შემდეგ, საუდის არაბეთის მემკვიდრე პრინცსა და კატარის ამირას შეხვდა, რათა ჰორმუზის სრუტეში ნაოსნობის თავისუფლება აღდგეს და პარტნიორების ენერგეტიკული ინფრასტრუქტურა დაცული იყოს. პრეზიდენტის განცხადებით, მიმდინარეობს ალტერნატიული მარშრუტების განვითარებაც, რათა ქვეყნის დამოკიდებულება ამ სტრატეგიულ კორიდორზე შემცირდეს.

"როდესაც ნავთობი ზეწოლის ქვეშაა, ავტოგასამართ სადგურებზე ფასები იზრდება. მე ვიცი, რას ნიშნავს ეს ფრანგებისთვის.

ის, რაც ჩვენი ნაპირებიდან ათასობით მილის მოშორებით ხდება, ყოველთვის ჩვენს ყოველდღიურ ცხოვრებაზე აისახება.

ასე რომ, ვმოქმედებ დაძაბულობის შესამცირებლად, ჩვენი მომარაგების უზრუნველსაყოფად და ფასებზე ზეწოლის შესამსუბუქებლად.

ამ კვირის დასაწყისში ერაყის პრემიერმინისტრთან გამართული საუბრის შემდეგ, დღეს საუდის არაბეთის მემკვიდრე პრინცსა და კატარის ამირას შევხვდი.

პრიორიტეტია: ნავთობის ტრანზიტისთვის სასიცოცხლოდ მნიშვნელოვან ჰორმუზის სრუტეში ნაოსნობის აღდგენა, ჩვენი პარტნიორების ენერგეტიკული ინფრასტრუქტურის დაცვა და წარმოების უზრუნველყოფა. აუცილებელია ჩვენი მომარაგების გარანტირება.

ჩვენ ჩვენს კოალიციურ პარტნიორებთან ერთად ვმუშაობთ ჰორმუზის სრუტეში ნაოსნობის თავისუფლებისთვის.

ჩვენ ასევე ვმუშაობთ ალტერნატიული მარშრუტების გახსნაზე, რათა შევამციროთ დამოკიდებულება ამ სტრატეგიულ გასასვლელზე და უზრუნველვყოთ ჩვენი მომარაგება.

ნავთობის მეტი მარშრუტი ნიშნავს ნაკლებ დამოკიდებულებას. ნაკლები დამოკიდებულება ნიშნავს მეტ უსაფრთხოებას. ხოლო მეტი უსაფრთხოება ნიშნავს ნაკლებ ზეწოლას ფასებზე", — დაწერა მაკრონმა.