კოლექტიური უსაფრთხოების ხელშეკრულების ორგანიზაციიდან (CSTO) გარიცხვით არავინ უნდა შეგვაშინოს: თუ მათ ჩვენი გარიცხვა უნდათ, მაშინ გაგვრიცხონ, — ამის შესახებ სომხეთის პრემიერმინისტრმა ნიკოლ ფაშინიანმა 17 სექტემბერს გამართულ ბრიფინგზე განაცხადა და NEWS.am-ის კორესპონდენტის კითხვას უპასუხა.

ფაშინიანმა ასევე ისაუბრა რუსულ ბაზაზე, რომელიც სომხეთის ტერიტორიაზეა და აღნიშნა, რომ ქვეყნის უსაფრთხოებისთვის ეს ბაზა "არაფერს აკეთებს". მისივე თქმით, თუ მათ ქვეყანაში დარჩენა სურთ, სომხეთი მზადაა იმ ბაზის ქვეყნის ტერიტორიაზე არსებობის პირობებზე იმსჯელოს, რომელიც სომხეთს "არ სჭირდება".

"ჩვენი პოზიცია ასეთია: თუ მათ ჩვენი გარიცხვა უნდათ, ჰქონდეთ ამის ნება. თუ ჩვენი გარიცხვა არ უნდათ, მაშინ ნუ გაგვრიცხავენ. ჩვენ სომხეთში მოქმედი რუსული სამხედრო ბაზის საკითხი განსახილველად არასდროს წამოგვიწევია. ახლა ეს საკითხი რუსეთმა წამოჭრა და ჩვენც ჩვენს პოზიციას ამ განხილვის გარშემო ვაგებთ. ვამბობ, რომ 102-ე სამხედრო ბაზამ და 2022 წლის სექტემბრის მოვლენებმა აჩვენა, რომ იგი სომხეთის უსაფრთხოებისთვის სასიცოცხლოდ მნიშვნელოვანი არ არის. ახლა მათ ეს საკითხი განსახილველად წამოსწიეს — ძალიან კარგი. არ ყოფილა არცერთი შემთხვევა, რომ ჩვენს რომელიმე ოფიციალურ პირს მსგავსი კითხვა რუსეთის რომელიმე წარმომადგენლისთვის დაესვას ან ასეთი თემა წამოეჭრას. ამაზე საჯაროდ არც ჩვენ ვისუბრეთ. ახლა, თუ ისინი გასვლას გადაწყვეტენ, ჩვენ წინააღმდეგნი არ ვიქნებით. პირდაპირ ვამბობ: 102-ე სამხედრო ბაზის ყოფნა სომხეთის უსაფრთხოებისთვის არაფერს აკეთებს. ეს 2022 წლის სექტემბრის მოვლენების დროსაც ვნახეთ. ჩვენ სამხედრო ბაზა არ გვჭირდება. რუსეთი მეგობრული ქვეყანაა; თუ მათ გასვლა სურთ, გააკეთონ ეს თუნდაც ხვალვე. თუ დარჩენა სურთ, მზად ვართ ვიმსჯელოთ იმ ბაზის ყოფნის პირობებზე სომხეთის რესპუბლიკაში, რომელიც არ გვჭირდება", — აღნიშნა ფაშინიანმა.

ცნობისთვის, კოლექტიური უსაფრთხოების ხელშეკრულების ორგანიზაცია მთავრობათაშორისი სამხედრო ალიანსია. იგი კოლექტიური უსაფრთხოების ხელშეკრულების გაგრძელებას წარმოადგენს, რომელსაც ხელი მოეწერა 1992 წლის 15 მაისს, უზბეკეთის დედაქალაქ ტაშკენტში, რუსეთის, სომხეთის, ტაჯიკეთის, უზბეკეთის, ყაზახეთისა და ყირგიზეთის მთავრობების მეთაურების მიერ. ამჟამად კოლექტიური უსაფრთხოების ხელშეკრულების ორგანიზაციაში შედის ბელარუსი, რუსეთი, სომხეთი, ტაჯიკეთი, ყაზახეთი და ყირგიზეთი.