სპორტის ყოფილ მინისტრზე, ლევან ყიფინაზე სავარაუდო გაუპატიურების საქმეს პროკურატურა ცალკე არ იძიებს. უწყების განმარტებით, მედისაშუალებით გავრცელებული აუდიოჩანაწერები ომეგა ჯგუფის საქმეს დაერთვება.

ტელეკომპანია რუსთავი 2-ის მიერ გავრცელებული ინფორმაციით, ყოფილი პროკურორი ოთარ ფარცხალაძე სპორტის ყოფილ მინისტრს ლევან ყიფიანს გაუპატიურებით ემუქრებოდა. რუსთავი 2-ის ცნობით, ფარცხალაძე ყიფიანს ფიზიკურად ერთ-ერთ სარდაფში გაუსწორდა.

იგივე ინფორმაცია დაადასტურა ომეგა ჯგუფის დამფუძნებელმა, ზაზა ოქუაშვილმა, რომელმაც მანამდე თქვა, რომ ლევან ყიფიანი მასსა და ხელისუფლებას შორის შუამავლი იყო.

საქართველოს პროკურატურამ მედიასაშუალებებში ომეგა ჯგუფთან დაკავშირებით გავრცელებულ აუდიოჩანაწერებზე საქმეზე გამოძიება 12 სექტემბერს დაიწყო.

აუდიოჩანაწერში, რომელიც 10 სექტემბერს რუსთავი 2-მა გაავრცელა, სავარაუდოდ, სპორტის ყოფილი მინისტრი ლევან ყიფიანი და ომეგა ჯგუფის დამფუძნებელ ზაზა ოქუაშვილს ბიძინა ივანიშვილის დეიდაშვილთან, უჩა მამაცაშვილთან საუბრის დეტალებს უყვება. ჩანაწერში ისმის, რომ მამაცაშვილი ომეგა ჯგუფის პრობლემების მოსაგვარებლად, მთავრობასთან მოლაპარაკებას აწარმოებდა და ამ თემაზე პრემიერთან შეხვედრასაც გეგმავდა.

ჩანაწერის მიხედვით, ომეგა ჯგუფის მფლობელს ბიძინა ივანიშვილის დეიდაშვილი უჩა მამაცაშვილი მთავრობასთან პრობლემების მოგვარებაში ორ მილიონ დოლარს სთხოვდა. ორი კვირის შემდეგ, პროკურატურამ ომეგა ჯგუფის საქმეს კიდევ რამდენიმე ჩანაწერი დაურთო.

ფინანსთა სამინისტროს განცხადებით, ომეგა ჯგუფში შემავალ სიგარეტის მწარმოებელ კომპანია შპს ოჯთ-ის საგადასახადო დავალიანების სახით ერიცხება 51 717 000 ლარი. სამინისტროს განმარტებით, დავალიანების ძირითად ნაწილს შეადგენს თამბაქოს ნაწარმზე აქციზის გადასახადის გადაუხდელობა. აღნიშნული დავალიანება დეკლარირებულია გადამხდელის მიერ 2015-2018 წლებში.