მას შემდეგ, რაც ცნობილი გახდა, რომ მმართველმა პარტიამ საპატრიარქოსთან შეხვედრის შემდეგ კანაფის კულტივაციის კანონპროექტი გაიწვია ქართულმა მარშმა გამარჯვება იზეიმა. მარშის ფეისბუქგვერდზე დაპოსტეს, რომ მთავრობას კანონპროექტი "გააწვევინეს" და მხარდამჭერებს გამარჯვება მიულოცეს.

ამ გადაწყვეტილებიდან გამომდინარე დაკმაყოფილდა მარშის მიერ წამოყენებული ერთ-ერთი ულტიმატუმი, რომლითაც ისინი სალომე ზურაბიშვილის მეორე ტურში მხარდაჭერას თანხმდებოდნენ. აპირებს თუ არა ორგანიზაცია მმართველი პარტიის რჩეული კანდიდატის მხარდაჭერას ამ კითხვით მათ ლიდერს, სანდრო ბრეგაძეს მივმართეთ.

როგორც ბრეგაძემ On.ge-ს განუცხადა, კანონპროექტის პარლამენტიდან გაწვევა არ იყო მარშის მოთხოვნა და მათ ქართველი ხალხისთვის ფოსტალიონის როლი შეასრულეს და მთავრობას ხმა მიაწვდინეს.

"საჭირო, კარგი მომენტი შევარჩიეთ როდის დაგვეყენებინა ეს მოთხოვნა. პირდაპირ გეტყვით, რომ არა მეორე ტური ამ კანონს უკან არავინ გაიწვევდა", — აცხადებს ბრეგაძე და ამბობს, რომ ეს მხოლოდ ერთი პირობაა და ისინი სხვა მოთხოვნის შესრულებასაც ელოდებიან.

მისი თქმით, სალომე ზურაბიშვილს მხარს მხოლოდ იმ შემთხვევაში დაუჭერენ, თუ ვადამდელი საპარლამენტო არჩევნებიც დაინიშნება. ბრეგაძე განმარტავს, რომ პარტია, რომლის რეიტინგიც არჩევნებზე 37 პროცენტით გამოვლინდა საკონსტიტუციო უმრავლესობას არ უნდა ფლობდეს.

"ეს არის აბსოლუტური ნონსენსი. ნებისმიერ ქვეყანაში, ნორმალურ ქვეყანაში ესეთ პირობებში თავად ხელისუფლება ჩაატარებდა ახალ არჩევნებს. პოლიტიკური ბალანსი შეიცვალა და საჭიროა ვადამდელი არჩევნების ჩატარება", — აცხადებს ბრეგაძე.

ქართულ მარშმა პირველ ნოემბერს განაცხადა, რომ თუ მთავრობა ორივე მოთხოვნას დაუკმაყოფილებდა ისინი აქტიურად ჩაერთვებოდნენ ზურაბიშვილის წინასაარჩევნო კამპანიაში.

არჩევნების მეორე ტური და კანაფის კულტივაციის კანონპროექტი

მას შედეგ რაც ცნობილი გახდა, რომ არჩევნები მეორე ტური გაიმართება მთავრობის წარმომადგენლებმა განაცხადეს, რომ ქართული საზოგადოებისგან შეცდომებზე მკაფიო გზავნილი მიიღეს და საჭიროა ხალხის პრობლემებით დაინტერესება, მათი მოფერება.

საპატრიარქოსთან კანაფის კულტივაციის კანონპროექტის განხილვის 46-ე დღეს და არჩევნების მეორე ტურის წინ საქართველოს მთავრობამ გადაწყვიტა პარლამენტიდან გამოწვიოს კანონპროექტი. შინაგან საქმეთა მინისტრის თქმით, მთავრობამ გადაწყვეტილება პოლიტიკური და საარჩევნო კონტექსტიდან გამომდინარე, საპატრიარქოსა და მოსახლეობის პოზიციის გათვალისწინებით მიიღო.