"ქართული საზოგადოებისგან მივიღეთ მკაფიო გზავნილი ჩვენს შეცდომებზე", - ასე გამოეხმაურა პრემიერ-მინისტრი, მამუკა ბახტაძე საპრეზიდენტო არჩევნების შედეგებს.

მისი თქმით, არჩევნებმა აჩვენა, რომ უმოკლეს დროში ქვეყანაში ბევრი რამაა შესაცვლელი და "საზოგადოების ეს გზავნილი მიღებული და გააზრებულია".

"მეორე ტურში, ყველა ჩვენ ერთად აღვნიშნავთ იმ ღირებულებებისა და ფასეულობის გამარჯვებას, რისთვისაც ჩვენ ყველანი ერთად ვიბრძოდით", - განაცხადა პრემიერმა ბრიფინგის დროს.

ცესკომ ხმების 100% დაითვალა. მონაცემების მიხედვით, საქართველოში მეორე ტური ხელისუფლების მხარდაჭერილ კანდიდატ სალომე ზურაბიშვილსა და გაერთიანებული ოპოზიციის კანდიდატ გრიგოლ ვაშაძეს შორის გაიმართება. ცესკომ წინასწარი მონაცემების განახლებული შედეგები გამოაქვეყნა.

შედეგები ასე გადანაწილდა:

  • სალომე ზურაბიშვილი (ხელისუფლების მხარდაჭერილი კანდიდატი) — 38,64%;
  • გრიგოლ ვაშაძე (ძალა ერთობაში) — 37,74%;
  • დავით ბაქრაძე (ევროპული საქართველო) — 10,97%;
  • შალვა ნათელაშვილი (ლეიბორისტული პარტია) — 3,74%;
  • ზურა ჯაფარიძე (გირჩი) — 2,26%;
  • დავით უსუფაშვილი (შენების მოძრაობა) — 2,26%.

გუშინ, 28 ოქტომბერს ეგზიტპოლების გამოცხადების შემდეგ, ევროპული საქართველოს საპრეზიდენტო კანდიდატმა, დავით ბაქრაძემ განაცხადა, რომ მეორე ტურში გაერთიანებული ოპოზიციის კანდიდატს, გრიგოლ ვაშაძეს დაუჭერს მხარს. ვაშაძეს მხარდაჭერა გამოუცხადა რესპუბლიკურმა პარტიამაც.

შენების მოძრაობის ლიდერმა, დავით უსუფაშვილმა კი განაცხადა, რომ მეორე ტურში არც ერთ კანდიდატს არ დაუჭერს მხარს.

ამავე თემაზე: