როგორც On.ge-ს თვითმხილველმა აცნობა, რამდენიმე დღეა, თბილისში, გლდანი-ნაძალადევის ტერიტორიაზე მდებარე კორპუსების ლიფტების კარებზე ე.წ. ბიოსა და MDMA-ს შემცველ პაკეტებს ამაგრებენ.

ნარკოტიკული საშუალებები ორ განცალკევებულ პაკეტში დევს, რომელსაც რუსულ ენაზე აწერია - "სინჯი უფასოდ". იქვე ნომერია მითითებული, ესტონეთის სატელეფონო კოდით.

ფოტო: Fox

როგორც ჩანს, მარკეტინგულმა ხრიკებმა შავ ბაზარზეც შეაღწია. თუ ადრე სუნამოების და საცხების სინჯები რიგდებოდა, დღეს მსუბუქი ნარკოტიკების "შემოწმებაც" შეიძლება შეძენამდე (ოღონდ, მომღიმარი კონსულტანტების გარეშე).

თუმცა, შესაძლოა ყველაფერი არც ისე მარტივადაა. როგორც გვახსოვს, რამდენიმე კვირის წინ ვრცელდებოდა დაუზუსტებელი ინფორმაცია იმის შესახებ, რომ შსს-ს წარმომადგენლები Facebook-ის ქართველ მომხმარებლებს უცხოელი ტურისტების სახელით უკავშირდებოდნენ და ნარკოტიკების შეძენაში დახმარებას სთხოვდნენ. შემდეგ კი რაც ხდებოდა, ყველას აოცებდა. ასე რომ, ალბათ, უფასო ყველის მსგავსად, უფასო ნარკოტიკიც მხოლოდ სათაგურშია.