საერთაშორისო გამჭვირვალობა საქართველო მიიჩნევს, რომ უნდა აიკრძალოს სახელმწიფო სახსრების ისეთ იურიდიულ პირებზე გადაცემა, რომლებიც რეგისტრირებული არიან ოფშორულ ზონაში და ასევე მათზეც, რომელთა წილს ან აქციებს პირდაპირ, ან ირიბად ფლობს ოფშორულ ზონაში რეგისტრირებული პირი, და შესაბამისად შეუძლებელია საბოლოო მფლობელის დადგენა.

გავრცელებულ განცხადებაში TI კონკრეტულად საპარტნიორო ფონდზე საუბრობს და აღნიშნავს, რომ მას არ უნდა ჰქონდეს უფლება მოახდინოს თანაინვესტირება ისეთ პროექტებში, სადაც ინვესტორი ოფშორულ ზონაში დარეგისტრირებული კომპანიაა.

ამასთან ორგანიზაცია მიესალმება ქვეყანაში განხორციელებულ ნებისმიერ ინვესტიციას, თუმცა აღნიშნავს, რომ სახელმწიფო ორგანიზაციების მიერ ასეთ პარტნიორებთან ერთად თანაინვესტირება შეიცავს მნიშვნელოვან კორუფციულ რისკებს.

TI-ის აზრით, გამომძიებელ ჟურნალისტთა საერთაშორისო კონსორციუმის (ICIJ) მიერ ბოლო დღეებში გამოქვეყნებულმა ინფორმაციამ, რომელიც ოფშორულ ტერიტორიებზე დაფუძნებული კომპანიებისა და მათი მფლობელების შესახებ ინფორმაციას შეიცავდა, ცხადყო, რომ ოფშორული ზონები წარმოადგენენ მნიშვნელოვან პრობლემას და იძლევიან ფულის გათეთრების და სხვადასხვა ქვეყნის კორუმპირებული ჩინოვნიკების ან კრიმინალური ჯგუფებისთვის უკანონო ქონების დაფარვის შესაძლებლობას.

რამდენიმე დღის წინ ჟურნალისტებისთვის ხელმისაწვდომი გახდა იურიდიული ფირმა მოსაკ ფონსეკას საიდუმლო დოკუმენტები. 11 მილიონ საბუთში ცხადად ჩანს, თუ როგორ იყენებდნენ მსოფლიოს ცნობილი პოლიტიკოსები და ბიზნესმენები ოფშორულ ზონებს ფულის გასათეთრებლად და გადასახადებისგან თავის ასარიდებლად. აღნიშნულ დოკუმენტებში საქართველოს ექსპრემიერის, ბიძინა ივანიშვილის და თავდაცვის ყოფილი მინისტრის, დავით კეზერაშვილის სახელებიც ფიგურირებს.

ოფშორული ზონა - როგორც წესი, ამ ტერმინით მოიხსენიებენ მცირე ზომის, ნაკლები გადასახადების მქონე იურისდიქციებს, რომელთა მთავარი ფუნქცია, ქვეყნის არა-რეზიდენტი პირებისთვის ფინანსური სერვისებისთვის მიმზიდველი გარემოს შექმნაა.