პარლამენტში ხორავას ქუჩაზე შექმნილი საგამოძიებო კომისიის დასკვნისა და რეკომენდაციების წარდგენას დაპირისპირება მოყვა. უმრავლესობის დეპუტატმა, ზაზა პაპუაშვილმა უმცირესობის დეპუტატებს შეურაცხყოფა მიაყენა.

პაპუაშვილმა განაცხადა, რომ უმცირესობის წევრები "ცინიკოსები, უტიფრები და უზრდელები" არიან. მისმა შეფასებებმა ევროპული საქართველოს წარმომადგენლების კრიტიკა გამოწივია, რასაც პაპუაშვილმა უპასუხა: "ხელი აუქნიე ბებიაშენს, ბიჭო, ხმას დაუწიე, როცა ვლაპარაკობ აქ".

პარლამენტის თავმჯდომარე, ირაკლი კობახიძემ პაპუაშვილს კორექტულობის და სიმშვიდისკენ მოუწოდა, თუმცა დეპუტატმა თავმჯდომარის რჩევა არ გაითვალისწინა, რის შემდეგაც მას მიკროფონი გაუთიშეს.

პაპუაშვილმა მიკროფონის გათიშვის შემდეგაც გააგრძელა საუბარი. ევროპული საქართველოს წევრმა, ელენე ხოშტარიამ პაპუაშვილს უზრდელი უწოდა და დავა მათ შორის გაგრძელდა.

რამდენიმე წუთში თავმჯდომარემ პაპუაშვილს მიკროფონი ისევ ჩაურთო და მან იკითხა — "რა ახალი გარემოება დაადგინა საგამოძიებო კომისიამ". თუმცა, აღნიშნა რომ კომისიის თავმჯდომარის, სერგი კაპანაძის პასუხი არ სჭირდება და თავად აქვს პასუხი —"ვერაფერი".

სერგი კაპანაძემ განაცხადა, რომ კითხვა არ დასმულა და ვერ გასცემს პასუხს იმას, რაც არ უკითხავთ. მანვე მოუწოდა ყველას გაეცნონ კომისიის დასკვნას, რის შემდეგაც დაპირისპირება უმრავლესობის დეპუტატსა და ევროპული საქართველოს წევრებს შორის განახლდა.

პაპუაშვილმა ევროპული საქართველოს წევრებისაკენ გადაინაცვლა. საქმეში სხვა დეპუტატებიც ჩაერთვნენ, მათ შორის პატრიოტთა ალიანსის წევრი, ემზარ კვიციანი. ემზარ კვიციანსა და გიგა ბოკერიას შორის სიტყვიერი დაპირისპირება დაიწყო.

მალევე სიტყვიერი დაპირისპირება დეპუტატებს შორის ფიზიკურ შეხლა-შემოხლაში გადაიზარდა. პარლამენტის თავმდჯომარემ სხდომა რამდენიმე წუთით შეწყვიტა.