შინაგან საქმეთა სამინისტროს თბილისის პოლიციის დეპარტამენტის თანამშრომლებმა ნეონაცისტური დაჯგუფებისა და ფაშისტური იდეოლოგიის მხარდამჭერი 13 პირი დააკავეს, დაკავებულთაგან 7 არასრულწლოვანია. ამის შესახებ თბილისის პოლიციის დეპარტამენტის დირექტორმა ვაჟა სირაძემ ბრიფინგზე განაცხადა.

მისი თქმით, ჯგუფის წევრები, სამიზნეებად ძირითადად მათ ირჩევდნენ, ვინც მათ რადიკალურ შეხედულებებს არ იზიარებდა. თავდასხმები ხასიათდებოდა განსაკუთრებული სისასტიკით: მოძალადეები იყენებდნენ ხელკეტებს, ე.წ. "კასტეტებსა" და სხვადასხვა ბასრ საგნებს.

დანაშაული მხოლოდ ფიზიკური ანგარიშსწორებით არ სრულდებოდა. თავდამსხმელები მსხვერპლს ხშირად ძარცვავდნენ და თანხას სძალავდნენ აღნიშნულს კი მობილური ტელეფონებით იღებდნენ. ეს ვიდეომასალა ინტერნეტპლატფორმებზე მიზანმიმართულად ვრცელდებოდა.

"ბრალდებულების პირადი და საცხოვრებელი სახლების ჩხრეკისას ამოღებულია მათი კუთვნილი ცეცხლსასროლი, ხმოვანი და ცივი იარაღები, ნაცისტური სიმბოლიკის ნივთები, მობილური ტელეფონები, ნიღბები და სხვადასხვა ელექტრონული ტექნიკა.

მომხდარ ფაქტებზე გამოძიება სისხლის სამართლის კოდექსის 144-ე პრიმა, 225-ე, 178-ე, 181-ე და 236-ე მუხლებით მიმდინარეობს, რაც წინასწარი შეცნობით არასრულწლოვანის მიმართ, ჯგუფურად ჩადენილ წამებას, ცეცხლსასროლი იარაღის მართლსაწინააღმდეგოდ შეძენა-შენახვა-ტარებას, ძალადობის ორგანიზებას, ძარცვასა და გამოძალვას გულისხმობს.

საზოგადოებას შევახსენებთ, რომ რადიკალური ფაშისტური დაჯგუფებების რამდენიმე ლიდერი ანალოგიური ბრალდებით სასჯელს უკვე იხდის პენიტენციურ დაწესებულებაში, რომლებიც სამართალდამცველებმა რამდენიმე თვის წინ დააკავეს. მათთან ერთად, ასევე, დაკავებულია სხვადასხვა ნეონაცისტური დაჯგუფების კიდევ 24 წევრი", — ნათქვამია ბრიფინგზე