სულ რამდენიმე დღის წინ გამოვიდა ტრეილერი ჰარი პოტერის სერიალისა, რომლის პრემიერასაც მსოფლიოში მილიონობით ფანი მოუთმენლად ელოდება. HBO-ის ეს მასშტაბური პროექტი, რომელიც ჯოან როულინგის ლეგენდარული ჯადოსნური სამყაროს მორიგი ეკრანიზაცია გახლავთ, დღის სინათლეს 2026 წლის მიწურულს, საშობაოდ იხილავს. სერიალის პირველი სეზონის სახელწოდება ჰარი პოტერი და ფილოსოფიური ქვაა და ის მთლიანად პირველ წიგნს დაეთმობა.

და სანამ ინტერნეტსივრცეში გაცხარებული კამათი მიმდინარეობს ყველასთვის საყვარელი ჯადოსნური ისტორიის ახალ სიცოცხლეზე, სერიალის შემქმნელები უკვე შემდეგ სეზონზე მუშაობენ. HBO-ის ხელმძღვანელმა ქეისი ბლოისმა უახლეს ინტერვიუში განაცხადა, რომ ამჟამად მეორე სეზონის სცენარი იწერება. ამდენად, საინტერესოა, პირველი სეზონის დასრულების შემდეგ კიდევ რამდენ ხანს მოგვიწევს ლოდინი...

"მიზნად გვაქვს, [სეზონებს შორის] დიდი შუალედი არ გამოგვივიდეს", — აღნიშნავს ბლოისი, — "ცხადია, იმიტომაც, რომ ბავშვები სწრაფად იზრდებიან. თუმცა, შემდეგი სეზონები ყოველწლიურად არ გამოვა. ეს სერიალი ძალზედ დიდი და მასშტაბური პროექტია".

დანამდვილებით ვიცით ის, რომ ჯამში შვიდი სეზონი გვექნება — პოტერიადის თითოეულ წიგნს ცალკე სეზონი მიეძღვნება. პროექტის შემქმნელებს ეს საშუალებას აძლევს, ფილმებში გამოტოვებული დეტალები, პერსონაჟები თუ სიუჟეტური ხაზისთვის მნიშვნელოვანი დეტალები ახალ ეკრანიზაციაში წარმოაჩინონ. და, როგორც ტრეილერიდან ვიგებთ, ასეც აქვთ ჩაფიქრებული: ვიდეოში უკვე ვნახეთ, რომ ჰარის მაგლურ სამყაროში ცხოვრებას უფრო დეტალურად გავეცნობით. მეტიც, მსახიობებმა გაამხილეს, რომ სერიალში სხვა პერსონაჟების ჰოგვორტსმიღმა ცხოვრებასაც ვიხილავთ.

ვიცით ისიც, რომ სერიალი მთელ ათწლეულს გასტანს, ასე რომ, სიკვდილის საჩუქრების გამოსვლას სადღაც 2036 წლისთვის უნდა ველოდოთ. HBO კი ფინანსების დაზოგვას არ აპირებს — სერიალის ბიუჯეტი ისეთ გიგანტებს გაუტოლდება, როგორებიცაა Game of Thrones და House of the Dragon. ცნობისთვის, ამ უკანასკნელის პირველი სეზონი $125 მილიონამდე დაჯდა. რამდენიც ხარისხიან სერიალს დასჭირდებაო, ასე განსაზღვრა ბლოისმა ჰარი პოტერის ბიუჯეტი წინათ.

ფოტო: HBO Max

GOT ვახსენეთ და იმასაც შეგახსენებთ, რომ პოტერიადის ამ ეკრანიზაციაზე სწორედ Game of Thrones-ისა და The Last of Us-ის რეჟისორი, მარკ მაილოდი, მუშაობს. პროექტის შემოქმედებითი ხელმძღვანელი, სცენარისტი და ერთ-ერთი აღმასრულებელი პროდიუსერი კი ფრანჩესკა გარდინერი გახლავთ, რომელსაც ისეთ გახმაურებულ სერიალებზე უმუშავია, როგორებიცაა Succession და Killing Eve.

სერიალზე მუშაობის პროცესში აქტიურად არის ჩართული ჰარი პოტერის ავტორიც. ჯოან როულინგი პროექტის აღმასრულებელი პროდიუსერია და მისი უახლესი განცხადება მოწმობს, რომ "შედეგით კმაყოფილია".

ასევე იხილეთ:

თუ სერიალებს თვალს აქტიურად ადევნებ, არ დაგავიწყდეს, შემოიხედო ჩვენს ჯგუფშიც – ერთი სერიაც და…