აშშ-ის პრეზიდენტი, დონალდ ტრამპი აცხადებს, რომ ირანის ერთ-ერთი ყველაზე მნიშვნელოვანი ენერგეტიკული ობიექტის — ხარგის კუნძულის დაკავებას განიხილავს. ამის შესახებ ინფორმაციას BBC ავრცელებს.

"გულწრფელად რომ გითხრათ, ირანის ნავთობის ხელში ჩაგდება ყველაზე მეტად მიზიდავს, მაგრამ აშშ-ში ზოგიერთი სულელი ადამიანი ამბობს: "რატომ აკეთებთ ამას?" მაგრამ ისინი სულელები არიან", — განაცხადა პრეზიდენტმა.

როგორც ტრამპმა Financial Times-თან ინტერვიუში აღნიშნა, ირანის ნავთობის რესურსების ხელში ჩაგდება მისთვის "სასურველი სცენარია" და არ გამორიცხა, რომ აშშ-მ შესაძლოა პირდაპირ დაიკავოს ხარგის კუნძული. ამასთან დასძინა, რომ მსგავსი ოპერაცია ამერიკული ძალების ადგილზე გარკვეული პერიოდით დარჩენასაც მოითხოვს.

"შეიძლება, ხარგის კუნძული ავიღოთ, შესაძლოა, არა. ბევრი ვარიანტი გვაქვს. ეს ასევე ნიშნავს, რომ ჩვენ ხარგის კუნძულზე გარკვეული პერიოდით უნდა დავრჩეთ", — განაცხადა მან ინტერვიუში.

კითხვაზე, თუ რამდენად დაცულია კუნძული ირანის მიერ, პრეზიდენტმა ეჭვი გამოთქვა მათი თავდაცვის ეფექტურობაში.

"არა მგონია, რომ მათ რაიმე დაცვა ჰქონდეთ. მისი აღება ძალიან მარტივად შეგვიძლია", — აღნიშნა მან.

შეგახსენებთ, 28 თებერვალს ისრაელმა და ამერიკის შეერთებულმა შტატებმა ირანის სხვადასხვა ობიექტზე კოორდინირებული ერთობლივი იერიში მიიტანეს. ოპერაციას ისრაელის მხრიდან "ლომის ღრიალი", ხოლო აშშ-ის თავდაცვის დეპარტამენტის მიერ — "ეპიკური მრისხანება" ეწოდა.

თავდასხმის სამიზნეს მაღალჩინოსნები, სამხედრო მეთაურები და სტრატეგიული ობიექტები წარმოადგენდნენ. იერიშები მიზნად რეჟიმის შეცვლას ისახავს. იერიშის შედეგად მოკლულია ირანის უმაღლესი ლიდერი აიათოლა ალი ხამენეი.
მედიაში გავრცელებული ცნობებით, ირანის ახალ სულიერ ლიდერად ალი ხამენეის ვაჟი მოჯტაბა აირჩიეს. "ადამიანის უფლებათა დამცველების საინფორმაციო სააგენტოს" (HRANA) მონაცემებით, 2026 წლის დასაწყისისთვის ირანში მიმდინარე საპროტესტო აქციების დროს დაღუპულთა რაოდენობა მკვეთრად გაიზარდა და მსხვერპლთა რიცხვმა 6 000-ს გადააჭარბა.