სოციალურ ქსელში გავრცელდა ფოტოები, რომლებიც, სავარაუდოდ, სასტუმრო სტამბის ერთ-ერთ ნომერში გადაღებულ ინტერიერს ასახავს. კადრებში ჩანს ქართველი მხატვრის, ლია შველიძის 1990 წლის ნამუშევარი, რომელიც თეთრი საღებავით არის გადაღებილი და დამატებული აქვს ყვავილები და სხვა დეტალები.

"პატრიოტები ომში არიან", ლია შველიძის ნახატი, 1990

ფოტო: ლია შველიძე / Facebook

ლია შველიძის ნამუშევარი

ფოტო: Threads

ნახატი გადაღებვის პროცესში

ფოტო: Threads

ფოტოები თავდაპირველად ინსტაგრამის ანგარიშზე beebslola გავრცელდა, რომელიც ამ დროისთვის დახურულია. არსებული ინფორმაციით, ანგარიშის მფლობელი ქალი გარკვეული პერიოდის განმავლობაში ცხოვრობდა სასტუმროს ერთსა და იმავე ნომერში და სწორედ ამ პერიოდში მოახდინა ნამუშევარში თვითნებური ჩარევა.

ლია შველიძის ნამუშევარი ვანდალიზმის შემდეგ

ფოტო: Threads

გავრცელებულ კადრებში ჩანს, რომ ტილოდან წაშლილია წითელი საღებავით შესრულებული წარწერა, და დამატებულია სხვა ფენები, რომლებიც არ ეკუთვნის ორიგინალურ კომპოზიციას. ატვირთული ფოტოების მიხედვით, ცვლილებები ეტაპობრივად განხორციელდა.

ნამუშევრის გადაღებვის ამსახველი ფოტოები სოციალურ ქსელში დაპოსტა ანგარიშმა Lola Beebs სახელით, რომელსაც, სავარაუდოდ, საკუთარი ფოტოებიც უდევს იმავე ანგარიშზე.

ფოტო: Threads

სოციალურ ქსელში ასევე იძებნება პოსტი, სადაც იგივე ადამიანი წერს: "მე ალმათიდან ვარ, მაგრამ დროებით თბილისში ვიმყოფები. ახლა სწორედ ამ ნახატზე ვმუშაობ".

ფოტო: Thread

On.ge დაუკავშირდა სასტუმრო სტამბას და მომხდარზე კომენტარი სთხოვა, სასტუმროს ინფორმაციით ამბავზე გამოძიება მიმდინარეობს, და შესაბამისად ბევრ დეტალს ვერ გაასაჯაროებენ, თუმცა აღნიშნეს, რომ ნახატი უკვე ნახა ავტორმა, და მასთან შეთანხმებით, სარესტავრაციო სამუშაოები იგეგმება.

ლია შველიძის ნახატი ეკიდა სტუმრის საცხოვრებელ ოთახში, სადაც ის სტუმარმა უნებართვოდ დააზიანა. სასტუმროს ადმინისტრაციამ ამ ფაქტის გაგებისთანავე მიიღო შესაბამისი ზომები, შეატყობინა პოლიციას და მიმდინარეობს გამოძიება, სტუმარს დაეკისრა ფულადი ჯარიმაც. ამჟამად ნახატი იმყოფება უსაფრთხო გარემოში, ის დაათვალიერა ავტორმაც და მასთან შეთანხმებით, ვგეგმავთ, სარესტავრაციო სამუშაოებს. იმედი გვაქვს, რომ ნახატის სრულად აღდგენა მოხერხდება.

— სასტუმრო სტამბა.