ყაზახური კომპანია Kaspi.kz ინოვაციურ გადახდის სერვისს — Kaspi Alaqan-ს ნერგავს, რომელიც მომხმარებლებს საშუალებას აძლევს, პროდუქტის ან მომსახურების საფასური ხელისგულით გადაიხადონ.

პროექტის შესახებ ინფორმაცია კომპანიის თანადამფუძნებელმა

და აღმასრულებელმა დირექტორმა, მიხეილ ლომთაძემ სოციალურ ქსელ X-ზე გაავრცელა. მისი განცხადებით, პირველი ტერმინალები ალმატიში მიმდინარე წელს განთავსდება, ხოლო 2026 წლიდან ისინი მთელ ყაზახეთში იქნება გავრცელებული.

ლომთაძის თქმით, ახალი სერვისი მაქსიმალურად მარტივი, სწრაფი და უსაფრთხოა:

"იმისთვის, რომ ჩვენი მომხმარებლები ახალ სერვისებს სტრესის გარეშე იყენებდნენ, ჩვენ ვქმნით მათ როგორც კომფორტულს, ისე უსაფრთხოს. Kaspi Alaqan-მა წარმატებით გაიარა მრავალეტაპიანი ტესტირება და დაიმსახურა ექსპერტების დადებითი შეფასებები", — განაცხადა მან.

ყაზახეთის ფინანსური ბაზრის რეგულირებისა და განვითარების სააგენტოს ინფორმაციით, სისტემა სრულად აკმაყოფილებს ფინანსური ინსტიტუტებისთვის დაწესებულ ინფორმაციული უსაფრთხოების სტანდარტებს. გარდა ამისა, სერვისის ქსელური ინფრასტრუქტურის უსაფრთხოება, მონაცემთა დაცვა, ხელმისაწვდომობა და კონფიდენციალურობა ვაჭრობისა და ინტეგრაციის სამინისტროს სერტიფიცირებულმა ლაბორატორიამაც შეამოწმა.

Kaspi Alaqan მუშაობს ბიომეტრიულ ტექნოლოგიაზე — ხელის გულის სკანირებაზე. სისტემა სკანირებულ მონაცემებს ადარებს დაშიფრულ ციფრულ კოდს, რომელიც მომხმარებლის რეგისტრაციისას იქმნება. დეველოპერების თქმით, ასეთი იდენტიფიკაციის გაყალბება პრაქტიკულად შეუძლებელია.

ხელის გულით გადახდის ტექნოლოგია უკვე ვითარდება მსოფლიოს სხვადასხვა ქვეყანაში, მათ შორის აშშ-ში, ჩინეთსა და იაპონიაში, სადაც მისი გამოყენება პირველად 2015 წელს დაიწყეს.