6 მთავარი დეტალი ჯორჯ მარტინის ინტერვიუდან

ჯორჯ რ. რ. მარტინის ინტერვიუში The Hollywood Reporter-თან სატახტოთა თამაშის ფრენჩაიზთან დაკავშირებული რამდენიმე მნიშვნელოვანი ამბავი გახდა ცნობილი. მარტინი არის ყინულის და ცეცხლის სიმღერის წიგნების ავტორი, რომელზეც დაფუძნებულია HBO-ს სერიალი და მისი სპინოფები, და როგორც პროდიუსერი, აქტიურად არის ჩართული ამ შოუებში.

ინტერვიუში მარტინი საუბრობს დიდი ხნის ნანატრ ზამთრის ქარებზე, მიანიშნებს, როგორ განსხვავდება ზამთრის ქარები და საბოლოო რომანი გაზაფხულის სიზმარი სერიალის დასასრულისგან, და აზუსტებს დრაკონის სახლის შოურანერ რაიან კონდალთან თავისი ურთიერთობის მდგომარეობას. ასევე გვიყვება ახალ დეტალებს მრავალი სპინოფ პროექტის შესახებ, აქ კი არის 6 მთავარი ამბავი:

1. სხვა ავტორი არასდროს გადაიბარებს ზამთრის ქარებს

მიუხედავად იმისა, რომ ზამთრის ქარების მოლოდინი საკმაოდ დიდი ხანია გრძელდება, მარტინი ხაზს უსვამს, რომ თუ ის წიგნის დასრულებამდე გარდაიცვალა, არ არსებობს რაიმე სარეზერვო გეგმა, რომ წიგნი სხვამ დაასრულოს. ეს სიტუაცია შედარებულია ფენტეზის სერიასთან დროის ბორბალი, რომელიც ბრენდონ სანდერსონმა დაასრულა რობერტ ჯორდანის გარდაცვალების შემდეგ.

მარტინი კვლავ ღიად საუბრობს იმ შემოქმედებით სირთულეებზე, რაც ამ ნაწილზე მუშაობისას ჰქონდა, თუმცა მისი სურვილია, რომ თავად დაწეროს მთელი ისტორია და არ დაუტოვოს იგი სხვას:

თუ ეს მოხდება, ჩემი ნამუშევარი დაუმთავრებელი დარჩება. ეს იქნება, როგორც ედვინ დრუდის საიდუმლო

მარტინი აქ გულისხმობს ჩარლზ დიკენსის ბოლო რომანს, რომელიც ავტორის გარდაცვალების შემდეგ დაუმთავრებელი დარჩა. კითხვაზე, უფიქრია თუ არა მას ოდესმე ზამთრის ქარებზე საერთოდ უარი ეთქვა, მარტინი აღიარებს: "ეს აზრი ძალიან მძულს. დანებება ჩემთვის სრული მარცხი იქნებოდა. მინდა წიგნი დავასრულო".

ამასთან ერთად, ის ასევე ამბობს, რომ გარდა იმ სირთულეებისა, რაც წიგნის წერას ახლავს, ზოგჯერ მისი საკუთარი განწყობა და სხვა პროექტებზე ფოკუსირების სურვილი ხელს უშლის პროგრესს: "მკაფიოდ მითხრეს, რომ ზამთრის ქარები პრიორიტეტია, მაგრამ… არ ვიცი. ზოგჯერ უბრალოდ ამის განწყობა არ მაქვს".

2. ტირიონისა და სანსას ბედი შესაძლოა განსხვავებული იყოს წიგნების უფრო ბნელ დასასრულში

წლების განმავლობაში მარტინი ღიად ამბობდა, რომ სატახტოთა თამაშის გვიანდელ სეზონებში გარდაცვლილი პერსონაჟები აუცილებლად არ იქნებიან ისინი, ვინც წიგნებშიც დაიღუპებიან. ახლა ის ამ აზრს უფრო ავრცობს და მიანიშნებს, როგორ შეიძლება განსხვავდებოდეს ტირიონ ლანისტერისა და სანსა სტარკის ბედი, ასევე მთლიანად დასასრულის ტონი.

"მინდოდა მეტი ადამიანი მომეკლა. არა ისინი, ვინც სერიალში მოკლეს. მათ უფრო ბედნიერი დასასრული გააკეთეს. ტირიონისთვის ბედნიერ დასასრულს ვერ ვხედავ. მისი მთელი ბედი თავიდანვე ტრაგიკული იყო. სანსას მოკვლაც მინდოდა, მაგრამ სერიალში იმდენად მოეწონათ, შესაძლოა გადავარჩინო".

სერიალში ტირიონი ხდება ბრან სტარკის მეფის ხელი, რომელიც ვესტეროსის დიდ ნაწილს მართავს, ხოლო სანსა ხდება ჩრდილოეთის დედოფალი, რომელიც დამოუკიდებელ სამეფოდ ყალიბდება. სწორედ ტირიონი ასახელებს ბრანს მეფედ და ამბობს, რომ ის საუკეთესო არჩევანია შვიდი სამეფოსთვის ახალი დასაწყისისთვის.

მიუხედავად იმისა, რომ ბრანის გამეფება სადავო აღმოჩნდა, სანსას დასასრული ზოგადად დადებითად მიიღეს და მისი პერსონაჟის განვითარების ბუნებრივ გაგრძელებად ჩაითვალა. წიგნებში კი შესაძლოა მას იგივე ბედი არ ელოდა, თუმცა ახლა მარტინი ფიქრობს მის გადარჩენაზე.

სერიალის ფინალი ტრადიციული გაგებით ბედნიერი დასასრული არ არის, მაგრამ ტირიონი, სანსა, ბრანი, არია და ჯონი გადარჩებიან და ომისგან თავისუფალ სამყაროში ახალ ცხოვრებას იწყებენ. წიგნების დასასრული კი, როგორც ჩანს, უფრო ბნელი და ტრაგიკული იქნება, განსაკუთრებით ტირიონისთვის და, სავარაუდოდ, სხვა პერსონაჟებისთვისაც.

3. ჯონ სნოუს სპინოფის სიუჟეტი გაირკვა

ჯონ სნოუს სპინოფ სერიალი 2022 წელს გამოცხადდა, სადაც კიტ ჰარინგტონი კვლავ უნდა დაბრუნებულიყო მთავარ როლში, თუმცა 2024 წელს დადასტურდა, რომ პროექტი შეჩერდა. აქამდე სიუჟეტის შესახებ თითქმის არაფერი იყო ცნობილი, გარდა იმისა, რომ ის მიჰყვებოდა ჯონს მას შემდეგ, რაც ის მერვე სეზონის ბოლოს კედლის მიღმა წავიდა.

ინტერვიუში ირკვევა, რომ ჰარინგტონს, ორ სცენარისტთან თანამშრომლობით, სურდა გამოეკვლია ჯონი, როგორც ადამიანი, რომელიც მარტო ცხოვრობს და PTSD-ს ებრძვის. ჯონს უნდა გაეგდო თავისი მგელი, Ghost, და მოეშორებინა Longclaw, ხმალი, რომელსაც ის სატახტოთა თამაშში იყენებდა.

ჯონის ეს "გატეხილი" ვერსია დაკავებული იქნებოდა ქოხების აშენებით და შემდეგ მათი დაწვით. ეს ყველა ელემენტი ჰარინგტონის სურვილს ასახავდა, რომ პერსონაჟი არ ყოფილიყო წარმოდგენილი, როგორც გმირი, და მას სურდა, რომ საბოლოოდ ჯონი მომკვდარიყო.

იმის გათვალისწინებით, რომ წიგნების დასასრული ჯერ დაწერილი არ არის, სტატიაში ასევე ნათქვამია, რომ ჯონ სნოუს სპინოფი მარტინისთვის უფრო უსაფრთხო ვარიანტად მიიჩნეოდა. სანამ ის საკუთარ დასასრულზე მუშაობას აგრძელებს, სპინოფს მხოლოდ ჯონთან და იმასთან მოუწევდა გამკლავება, რაც კედლის ჩრდილოეთით ხდებოდა. ტირიონი, ბრანი, სანსა და სხვა პერსონაჟები, რომლებიც კედლის სამხრეთით იყვნენ, სიუჟეტში არ იქნებოდნენ ჩართული და მათი საბოლოო ბედი წიგნებთან არ მოვიდოდა წინააღმდეგობაში.

4. ახალი გაგრძელება ახლა ძალიან ადრეულ ეტაპზეა

მიუხედავად იმისა, რომ ჯონ სნოუს სპინოფი შეჩერდა, ახალი სიქველი ახლა ძალიან ადრეულ ეტაპზე მუშავდება. სცენარისტი Quoc Dang Tran, რომლის ნამუშევრებს შორის არის სერიალი Drops of God, ჩართულია ახალი ისტორიის შექმნაში, რომელიც GOT-ის მოვლენების შემდეგ განვითარდება.

სერიალმა შესაძლოა ფოკუსი გადაიტანოს არია სტარკზე, რომელსაც კვლავ მეისი უილიამსი ითამაშებს, მას შემდეგ რაც ის უცნობ ტერიტორიებში იმოგზაურებს, თუმცა ხაზგასმულია, რომ არც ის და არც სხვა მსახიობები ოფიციალურად ჯერ არ არიან პროექტში ჩართულნი.

ერთ-ერთი წყაროს ინფორმაციით "ჩვენ ძალიან დაინტერესებულები და აღფრთოვანებულები ვართ სიქველის პერსპექტივით, მაგრამ ასევე ძალიან კარგად გვესმის, რამდენად მაღალია აღსრულების სტანდარტი".

კიტ ჰარინგტონის მიერ ჯონ სნოუს თამაში ამ განვითარების ეტაპზე მყოფ სიქველში ახლა უფრო ნაკლებად სავარაუდო ჩანს, ვიდრე ოდესმე, მას 2025 წლის დეკემბერში ჰკითხეს, ვის მიიჩნევს პერსონაჟის გახმოვანებისთვის კარგ კანდიდატად შესაძლო აუდიოწიგნში, რაზეც უპასუხა: "არა, ღმერთო არა. საერთოდ არ მინდა ამას მივეკარო. 10 წელი გავატარე ამაში. მადლობა, არ მინდა".

5. ეგონის ისტორია შესაძლოა ფილმად გადაიქცეს

ეგონ I ტარგარიენის მიერ ვესტეროსის დაპყრობაზე დაფუძნებული სპინოფი ადრე უკვე იყო განვითარების ეტაპზე, როგორც სერიალი, თუმცა ახლა Warner Bros.-ის კინოგანყოფილება ასევე მუშაობს ვერსიაზე, რომ ის შესაძლოა სრულმეტრაჟიან ფილმად გადაიქცეს.
პროექტის მასშტაბი შედარებულია დიუნის ფილმებთან, რომლებიც მასშტაბური ბლოკბასტერები იყო და წარმატებით გადაიღო დენის ვილნევიმ ფრენკ ჰერბერტის რომანის მიხედვით.

თუ ეგონის დაპყრობა სრულმეტრაჟიან ფილმად იქცევა, ეს იქნება პირველი ასეთი პროექტი სატახტოთა თამაშის ფრენჩაიზში. თუმცა, ეს არ არის პირველი შემთხვევა, როცა ფრენჩაიზი თითქმის ამ გზით წავიდა. 2018 წელს გავრცელდა ინფორმაცია, რომ შოურანერები დევიდ ბენიოფი და დ. ბ. ვაისი განიხილავდნენ ვარიანტს, რომლის მიხედვითაც ფინალური სეზონი ექვსსაათიანი იქნებოდა და სამ ფილმად გამოვიდოდა.

ვაისმა განმარტა, რომ მას და ბენიოფს აუცილებელად არ სურდათ ფილმებზე გადასვლა, თუმცა ეს სიუჟეტურად და ფინანსურად ყველაზე შესაძლო გზად ეჩვენებოდათ ისტორიის დასასრულებლად. HBO-ს ხელმძღვანელობამ ეს იდეა არ მიიღო, თუმცა ახლა ეგონის სპინოფთან დაკავშირებით მსგავსი რამ შესაძლოა რეალობად იქცეს.

6. მარტინის ურთიერთობა რაიან კონდალთან ახლა კატასტროფულია

მარტინი ადრეც გულწრფელად საუბრობდა იმაზე, რომ უკმაყოფილო იყო იმ გარკვეული ცვლილებებით, რაც შოურანერმა რაიან კონდალმა დრაკონის სახლის მეორე სეზონში შეიტანა და როგორ განსხვავდება ისინი წყაროს მასალისგან, ცეცხლი და სისხლისგან. დრაკონის სახლის მესამე სეზონის წინ, რომელიც 2026 წლის ბოლოს გამოვა, მარტინი ახლა ამბობს, რომ მისი ურთიერთობა კონდალთან "დაძაბულზე უარესია. კატასტროფულია".

კონკრეტული ცვლილებების მიღმაც, მარტინი განმარტავს, რომ მისი იმედგაცრუება იმით არის გამოწვეული, როგორ შეიცვალა მათი ურთიერთობა, პირველი სეზონის დროს ისინი პარტნიორები იყვნენ და კარგად თანამშრომლობდნენ, ხოლო მეორე სეზონში კონდალმა მისი აზრის გათვალისწინება შეწყვიტა.

"მე დავიქირავე რაიანი. ვფიქრობდი, რომ მე და რაიანი პარტნიორები ვიყავით. და ვიყავით კიდეც მთელი პირველი სეზონის განმავლობაში. ვკითხულობდი სცენარების ადრეულ ვერსიებს. ვაძლევდი შენიშვნებს. ის ზოგიერთ რამეს ცვლიდა. ყველაფერი ძალიან კარგად მუშაობდა, ასე მეგონა.

"შემდეგ მეორე სეზონზე გადავედით და მან, ფაქტობრივად, შეწყვიტა ჩემი მოსმენა. ვაძლევდი შენიშვნებს და არაფერი ხდებოდა. ზოგჯერ მიხსნიდა, რატომ არ აკეთებდა ამას. სხვა დროს მეუბნებოდა: "კარგი, ჰო, ამაზე ვიფიქრებ". ეს სულ უფრო უარესდებოდა და მე უფრო და უფრო ვღიზიანდებოდი. საბოლოოდ იქამდე მივედით, რომ HBO-მ მითხრა, შენიშვნები მათთვის მიმეწოდებინა და ისინი გადასცემდნენ რაიანს ჩვენს გაერთიანებულ შენიშვნებს".

მარტინის ურთიერთობა კონდალთან მკვეთრად განსხვავდება მისი ურთიერთობისგან აირა პარკერთან, რომელიც ახალი სატახტოთა თამაშის სპინოფის, შვიდი სამეფოს რაინდის შოურანერია. ინტერვიუში ის პარკერს აქებს და ამბობს, რომ ის "შესანიშნავია და, როგორც ჩანს, იგივე პრიორიტეტები აქვს, რაც მე, ცდილობს გააკეთოს ისეთი რამ, რაც პერსონაჟების მიმართ ძალიან ერთგულია".

ასევე ნახეთ:

ბოლო ამბები:

გირჩევთ