"საქართველოში ელექტროენერგიის ტარიფის 5 თეთრით გაძვირება ბიძინა ივანიშვილის კრიპტო მაინინგის ბიზნესს უკავშირდება" — ამის შესახებ "გახარია საქართველოსთვის" პარტიის ერთ-ერთმა წევრმა, ქეთევან ბაკარაძემ ბრიფინგზე განაცხადა.

"გაძვირების ერთ-ერთ მიზეზად გაზრდილი ელექტრომოხმარება დაასახელეს [ხელისუფლებამ]. თუმცა რეალობა სხვაგვარია: საქართველოში არც ახალი მსხვილი საწარმოები გახსნილა და არც მოსახლეობის რაოდენობა გაზრდილა, პირიქით, დემოგრაფიული კრიზისი გვაქვს. ამ ფონზე ლოგიკურად ჩნდება კითხვა : რა იწვევს მოხმარების ზრდას? ერთ-ერთი პასუხი არის- კრიპტომაინინგი და ის ბიტკოინები, რომელიც ბიძინა ივანიშვილის ბიზნესს უკავშირდება.

შედეგად, მათი მილიარდების ფასს “ქართული ოცნება” საკუთარი მოსახლეობის ხარჯზე იხდის: პენსიონერების, მრავალშვილიანი ოჯახების, მარტოხელა დედების, სტუდენტებისა და მცირე ბიზნესების ხარჯზე. იმ ადამიანების, რომლებსაც ისედაც თვიდან თვემდე ძლივს გააქვთ თავი.

ერთადერთი რისი შეთავაზებაც ოცნებას ახლა და მომავალში შეუძლია მოსახლეობისთვის, ეს არის გაძვირებული ცხოვრების უფრო და უფრო გართულება, იზოლაცია და გადარჩენისთვის უმძიმეს პირობებში ბრძოლა." — განაცხადა ქეთევან ბაკარაძემ

გარდა დენის ტარიფზე საუბრისა, ქეთევან ბაკარაძე მთავრობას მოუწოდებს, რომ გაიზარდოს პენსიები 200 ლარით და დაწესდეს მინიმალური ხელფასი 1150 ლარამდე. მისი თქმით, "არ შეიძლება დღეს საქართველოში საქართველოს მოქალაქე იყოს იაფი მუშა ხელი."

ცნობილი ფაქტია, რომ ბიძინა ივანიშვილი დაკავშირებულია კრიპტო მაინინგის ბიზნესთან. სწორედ ეს გახდა "თანაინვესტირების ფონდის" ყოფილ დირექტორ გიორგი ბაჩიაშვილთან დავის მიზეზი.

ამას გარდა, 2024 წელს Bm.ge-სთან მესტიის მერი ამბობდა, რომ "მესტიის მუნიციპალიტეტის ხაიშისა და ჭუბერის ადმინისტრაციულ ერთეულებში ელექტროენერგიის კატასტროფულმა ზრდამ ტრანსფორმატორების გათიშვა გამოიწვია და ელექტროენერგიის მოხმარების სავალალო ზრდა პირდაპირ დაკავშირებულია უკონტროლო კრიპტო მაინინგთან.