იტალიაში, ქალაქ პარმასთან მდებარე მუზეუმიდან პიერ-ოგიუსტ რენუარის, პოლ სეზანის და ანრი მატისის მილიონობით ევროს ღირებულების ნახატები მოიპარეს.

პოლიციის ცნობით, 22 მარტს, ოთხი ნიღბიანი მამაკაცი შეიჭრა მანიანის ფონდის ვილაში და გაიტანა რენუარის თევზები, სეზანის ნატურმორტი ალუბლებით და მატისის ოდალისკა ტერასაზე.

"თევზები", პიერ-ოგიუსტ რენუარი

ფოტო: BBC

იტალიური მედიის ინფორმაციით, დაჯგუფებამ ყველაფერი სამ წუთში მოახერხა: მათ მოქმედება მხოლოდ მუზეუმის სიგნალიზაციამ შეაწყვეტინა, რამაც უფრო მეტი ნამუშევრის გატანა აღკვეთა.

ეს დაწესებულება უახლესია იმ ობიექტებს შორის, რომლებიც ძარცვის სამიზნე გახდა, გასული წლის ოქტომბერში ლუვრიდან დღისით განხორციელებულმა ძარცვამ, რომლის დროსაც ფასდაუდებელი ძვირფასეულობა მოიპარეს, დიდი გამოხმაურება გამოიწვია.

მედიის ცნობით, მძარცველებმა ძალით შეანგრიეს პარმის სოფლის ტერიტორიაზე მდებარე ვილის მთავარი კარი, და შენობის პირველ სართულზე არსებული ფრანგული ოთახიდან ნახატები გაიტანეს.

ფონდის განცხადებით, დაჯგუფება "სტრუქტურირებული და ორგანიზებული" ჩანდა და, როგორც ჩანს, კიდევ მეტის მოპარვას გეგმავდა, თუმცა კერძო კოლექციის სიგნალიზაციამ ამოქმედდა და პოლიცია გამოიძახა.

რეგიონული მაუწყებლის, TGR-ის ინფორმაციით, რომელიც ამ ამბავს პირველად გამოეხმაურა, დამნაშავეებმა გაქცევა ღობეზე გადაძრომით მოახერხეს.

მაუწყებლის შეფასებით, მოპარული ნამუშევრების საერთო ღირებულება 9 მილიონ ევროს შეადგენს, ხოლო მხოლოდ თევზების ღირებულება 6 მილიონ ევროს აღწევს, რაც ამ შემთხვევას იტალიაში ბოლო წლების ერთ-ერთ ყველაზე მნიშვნელოვან ძარცვად აქცევს.

"ოდალისკა ტერასაზე", ანრი მატისი

ფოტო: BBC

  • რენუარი იმპრესიონისტული მოძრაობის ერთ-ერთი წამყვანი მხატვარი იყო და ზეთით შესრულებული თევზები დაახლოებით 1917 წელს შექმნა;
  • სეზანის ნამუშევარი, რომელიც დაახლოებით 1890 წელს არის შექმნილი, მის მიერ შესრულებული ალუბლის თემაზე შექმნილი ნატურმორტებიდან ერთ-ერთია, თუმცა ეს ნამუშევარი იშვიათია, რადგან შესრულებულია აკვარელით, ტექნიკით, რომელსაც მხატვარი სიცოცხლის ბოლო წლებში უფრო აქტიურად იყენებდა;
  • მატისის მიერ 1922 წელს დახატული ოდალისკა ტერასაზე ორ ფიგურას ასახავს, ერთი მზეზე წევს, ხოლო მეორეს ვიოლინო უჭირავს.

"ნატურმორტი ალუბლით", პოლ სეზანი

ფოტო: BBC

ძარცვას ახლა იტალიის პოლიცია და ბოლონიის კულტურული მემკვიდრეობის დაცვის განყოფილება იძიებს. ფაქტის შესახებ ინფორმაცია საჯაროდ მხოლოდ კვირას გავრცელდა.

Magnani Rocca Foundation კომპოზიტორისა და ხელოვნების კოლექციონერის, ლუიჯი მანიანის გარდაცვალების შემდეგ, 1984 წელს, მის ოჯახურ სახლში დაარსდა.