ახალგაზრდების განათლებისა და აგროსექტორის მხარდაჭერა ტერაბანკის კორპორაციული სოციალური პასუხისმგებლობის ერთ-ერთი პრიორიტეტული მიმართულებაა. სწორედ ამ მიზნით, კომპანია მე-2 წელია, საქართველოს აგრარულ უნივერსიტეტთან თანამშრომლობს.

სტუდენტები პრაქტიკული საგნის, "აგროპროექტის" ფარგლებში, სემესტრის განმავლობაში მოყვანილი ერთწლიანი კულტურების მოსავალს აგროფორუმზე წარადგენენ. ტერაბანკმა, პარტნიორობის ფარგლებში, აგრარული უნივერსიტეტის სტუდენტებს სწავლის გადასახადი დაუფინანსა.

ტერაბანკის წლევანდელ სტიპენდიანტებს შორის რატი ფეიქრიშვილია. რატის თქმით, "აგროპროექტი" სტუდენტებისთვის განსაკუთრებით საინტერესოა, რადგან მათ შესაძლებლობას აძლევს, პრაქტიკაში გამოსცადონ ის ცოდნა, რომელსაც ამ დრომდე თეორიულად ეუფლებოდნენ.

"მიუხედავად იმისა, რომ სხვადასხვა ნაკვეთზე ვმუშაობდით, ყველანი ერთმანეთს ვეხმარებოდით და ვცდილობდით, ნებისმიერი დავალება ერთობლივი ძალისხმევით შეგვესრულებინა. სწორედ ამ გუნდურობამ აქცია სამუშაო პროცესი სასიამოვნო გამოცდილებად. საბოლოოდ, ხარისხიანი მოსავალი გაწეული შრომის ღირსეული შედეგია, რომელიც დადებითი ემოციებით გვავსებს.

აგრარული სექტორი ყოველდღიურად ვითარდება, ინერგება ახალი ტექნოლოგიები და მიდგომები. მინდა, რომ მთელი ჩემი კარიერა აგრონომიას მივუძღვნა, შევისწავლო უახლესი ტექნოლოგიები და შევიტანო ჩემი წვლილი საქართველოს სოფლის მეურნეობის განვითარებაში", — ამბობს რატი.

აღნიშნულ გზაზე რატის ერთ-ერთი მხარდამჭერი ტერაბანკია. კომპანიისთვის მსგავსი ინიციატივები გრძელვადიანი ინვესტიციაა, რაც მოტივირებულ ახალგაზრდებს ეხმარება, მთელი ყურადღება პროფესიულ ზრდას დაუთმონ და სექტორის რეალური ტრანსფორმაციის ნაწილად იქცნენ.