სამოქალაქო აქტივისტმა, კესო დეკანოსიძემ ქართული ოცნების საპატიო თავმჯდომარის, ბიძინა ივანიშილის გასამართლების მოთხოვნით პარლამენტთან შიმშილობა დაიწყო. მისი თქმით, ქვეყანაში გაყალბებული არჩევნები და პოლიტპატიმრების არსებობა ივანიშვილის გადაწყვეტილებაა. სწორედ ამიტომ, ის პარლამენტთან პოლიტპატიმრების გათავისუფლებასა და სამართლიან არჩევნებს მოითხოვს.

"ჩვენ ყველამ ვიცით, რომ ჩვენი საპროტესტო მოძრაობის ორი მთავარი მოთხოვნილება არსებობს ზოგადად ქვეყანაში. ეს არის პოლიტპატიმრების გათავისუფლება და სამართლიანი არჩევნები," – აცხადებს დეკანოსიძე.

შიმშილობის მიზეზს აქტივისტი ბიძინა ივანიშვილს უკავშირებს და მის გასამართლებას ითხოვს.

"ჩემი შიმშილობის მიზანი და მოთხოვნა არის, რომ ოლიგარქი ბიძინა ივანიშვილის გასამართლების საკითხი დადგეს. გამოიძიონ მისი დანაშაულები და დააკავონ. არჩევნების გაყალბება ოლიგარქი ივანიშვილის მიერ იყო დაორგანიზებული. მან მიიტაცა სახელმწიფო, ასევე ქიმიური იარაღით ადამიანების მოწამვლა, ესეც არის გამოსაძიებელი. ივანიშვილს მიტაცებული აქვს სახელმწიფო, მან დაიმორჩილა მთელი სამართალდამცავი სისტემა, მართლმსაჯულება და შესაბამისად, არ არის იმის იმედი, რომ საქართველოში გამოიძიებენ მის დანაშაულებს," — განაცხადა მან.

როგორც თავად კესო დეკანოსიძე აცხადებს, ხალხის მოთხოვნიდან გამომდინარე, იგი მზად არის უპასუხოს ყველა შეკითხვას და ამასთან, მოქალაქეებსაც მობილიზებისკენ მოუწოდებს.

"ახლა რაც შეეხება ჩემი შიმშილობის საკითხს, ვინაიდან ხალხს უჩნდება ეს კითხვები, მე ამ შეკითხვაზე გიპასუხებთ. ყოველი ადამიანის ხმას აქვს ძალა. ყოველი ადამიანის შიმშილობას აქვს ძალა. რაც უფრო მეტი ვიქნებით, მით უფრო მაღალი იქნება შედეგი. ასე, რომ ვისაც გნებავთ შედეგი, ვისაც გნებავთ ცვლილებები, შეგიძლიათ შემომიერთდეთ ამ პროცესში. და, აქვე დავამატებ, ჩვენ ახლა ან ვიმოქმედებთ გაძლიერებული ძალებით ან ივანიშვილი გააფორმებს დიქტატურას და ჩვენ კარგად უნდა ვიცოდეთ, რომ ვეღარ ვიცხოვრებთ ნორმალურ ქვეყანაში, ყველანი განწირულები ვიქნებით ციხისთვის, უსამართლო მართლმსაჯულებისთვის და ყველას მოგვიწევს უკანონობაში და მორჩილებაში ცხოვრება.

ასე, რომ მოგიწოდებთ, ვისაც გნებავთ ცვლილებები შემომიერთდით იმ მთავარ მოთხოვნაში, რომ დააკავონ N1 დამნაშავე, ოლიგარქი ბიძინა ივანიშვილი." — აღნიშნა დეკანოსიძემ.

შეგახსენებთ, მე-18 დღეა პარლამენტთან აქტივისტი დარეჯან ცხვიტარია ღია ცის ქვეშ ათევს ღამეს. 12 მარტს, ღამით, პარლამენტთან ერთ-ერთ კარავს ცეცხლი გაუჩნდა, რის შემდეგაც სამართალდამცავებმა ტერიტორიიდან კარვები აიღეს. დარეჯან ცხვიტარიამ NEWS.On.ge-თან საუბრისას განაცხადა, რომ ღამით პარლამენტთან ერთ-ერთ კარავს იმ დროს გაუჩნდა ცეცხლი, როდესაც კარვებში მყოფებს ეძინათ. მას შემდეგ, რაც ცეცხლის ჩაქრობა მოახერხეს, ცხვიტარიას განცხადებით, დილის 7 საათზე პოლიციამ კარავში მყოფ პირებს ძალის გამოყენებით დაატოვებინა ტერიტორია და დაკითხვაზე გადაიყვანეს.