"ძალიან იმედგამაცრუებელია ეს განცხადება. პაატა მანჯგალაძე ისევე, როგორც სხვა ორგანიზატორები, "თავისუფლების მოედანზე" სცენაზე იდგა და განაცხადეს, რომ გადაიბარეს ხელისუფლება — განაცხადა შალვა პაპუაშვილმა სახალხო დამცველის მიერ პაატა მანჯგალაძის საქმეზე სასამართლოს მეგობრის მოსაზრების წარდგენაზე კომენტირებისას.

პაპუაშვილის თქმით, "როდესაც მიდიხარ ასეთ ნაბიჯზე, უნდა შეეგუო პასუხისმგებლობას".

"ძალიან იმედგამაცრუებელია ეს განცხადება. პაატა მანჯგალაძე ისევე, როგორც სხვა ორგანიზატორები, "თავისუფლების მოედანზე" სცენაზე იდგა და განაცხადეს, რომ გადაიბარეს ხელისუფლება და პირადად ჩემი დაპატიმრება დაავალა პოლიციას, თუ სხვა ძალოვან უწყებებს. ეს დაავალა პირდაპირ. გასაგებია, რომ ასეთ კლოუნებს არავინ დაუჯერებს, მაგრამ 7 000 კაცი ჰყავდათ იქ შეკრებილი. სწორედ იმიტომ, რომ პოლიციამ და უსაფრთხოების სამსახურმა პრევენციულადაც იმოქმედეს, იმ მომენტშიც დროული რეაქცია იყო, სახელმწიფო დაცვის სამსახური იყო სათანადო მოწოდებაზე ნახეთ, რომ ხელჩართული ბრძოლა მოუწიათ ბიჭებს, რომლებიც იცავდნენ პრეზიდენტის რეზიდენცია იმისათვის, რომ არ დამდგარიყო ნეპალი. რომელსაც გვიანონსებდნენ, თითოეული ეს ადამიანი აანონსებდა სისხლის ღვრას საქართველოში და შეგახსენებთ, მას მხარი დაუჭირა ევროკავშირმა შეგახსენებთ. ასე რომ ჩვენ, გადავრჩით 1990-იან წლებში დაბრუნებას და ბატონ სახალხო დამცველსაც დარწმუნებული ვარ, თავის ასაკიდან გამომდინარე ახსოვს, რაც იყო 1990-იანი წლები. ამიტომ, აქ "აფთიაქური საზომით“ იმის ნახვა, რომ ვიღაც სცენის კუთხეში თუ ცენტრში იდგა... იქ იდგა. აბა, ერთი, წარმატებული ყოფილიყო ეს ყველაფერი, პაატა მანჯგალაძე იჯდებოდა, თუ არა პარლამენტის თავმჯდომარის სავარძელში ან რომელიმე სხვა სავარძელში? ძალიან გემრიელად, კომფორტულად შეირგებდა თუ არა იმ თანამდებობებს და ექნებოდათ თუ არა გადანაწილება. როდესაც მიდიხარ ასეთ ნაბიჯზე, უნდა შეეგუო პასუხისმგებლობას", — განაცხადა შალვა პაპუაშვილმა ბრიფინგზე.

ცნობისათვის, ომბუდსმენმა 4 ოქტომბრის „მშვიდობიანი დამხობის“ საქმეზე დაპატიმრებული ერთ-ერთი პოლიტიკოსის, პაატა მანჯგალაძის საქმეზე „სასამართლოს მეგობრის“ მოსაზრება წარადგინა და სასამართლოს მიუთითა, რომ მანჯგალაძის წინააღმდეგ საქმეში მტკიცებულება არ არსებობს.