ევროპარლამენტმა პირველად გადაწყვიტა ევროკავშირის წევრი ქვეყნის, კერძოდ კი, უნგრეთის დასჯა. ევროპარლამენტის ანგარიშში საუბარია უნგრეთში ხელისუფლების შტოების პრინციპების დარღვევაზე, პოლიტიკური თავისუფლების შეზღუდვასა და კორუფციაზე.

უნგრეთის პრემიერ-მინისტრმა ვიქტორ ორბანმა განაცხადა, რომ მიგრაციის პოლიტიკის გამო ევროპარლამენტარები ქვეყნის დასჯას ცდილობენ.

"თქვენ ადანაშაულებთ არა ხელისუფლებას, არამედ ქვეყანას, რომელიც ათასი წელია ქრისტიანული საზოგადოების ნაწილია", — აღნიშნა ორბანმა.

გარდა ამისა, ევროპარლამენტის ანგარიშში საუბარია უნგრეთის სასამართლოს თავდასხმებზე, პრესის თავისუფლების შეზღუდვასა და ევროკავშირის გრანტების გადანაწილების ბოროტად გამოყენებაზე.

"ძალიან ადვილია იმაზე საუბარი, რომ მთელ უნგრეთს შეურაცხყოფას აყენებენ. მაგრამ თქვენ არ ხართ მთელი უნგრეთი, თქვენ პოლიტიკური პარტიისა და უნგრეთის მთავრობის ლიდერი ხართ, ყველაზე კორუმპირებული მთავრობის ევროკავშირში. უნგრეთი უფრო დიდია, ვიდრე თქვენ", — განაცხადა ევროპარლამენტში წერვმა და ბელგიის ყოფილმა პრემიერი-მინისტრმა, გი ვერჰოფსტადტმა.

მან, ასევე, განმარტა, ახლა რომ ევროკავშირში უნგრეთის გაწევრიანების საკითხს განიხილავდნენ, ქვეყანას შეუსაბამობის გამო არ მიიღებდნენ.

თავის რეზოლუციაში ევროპარლამენტი მოუწოდებს ევროპულ საბჭოს, უნგრეთის მიმართებით კონკრეტული პროცედურები ევროკავშირის დებულების შესაბამისად გაატაროს. ამ შემთხვევაში კი მეშვიდე მუხლით იხელმძღვანელოს, რომელშიც დარღვევის აღმოფხვრის რეკომენდაციებზეა საუბარი. ამავე დროს, უნგრეთს ხმის მიცემის უფლების ჩამორთმევა ჯერჯერობით არ ემუქრება.

ამავე დროს, პოლონეთის სახით უნგრეთს ჰყავს მოკავშირე. პოლონეთის წინააღმდეგ მსგავსი პროცედურა ევროკომისიამ წამოიწყო და ვიქტორ ორბანმა აღნიშნა, რომ პოლონეთის დასჯის ნებისმიერ მცდელობას ვეტოს დაადებს.