განათლების ხარისხის განვითარების ეროვნული ცენტრის განცხადებით, შავი ზღვის საერთაშორისო უნივერსიტეტმა ჯარიმის გადახდის შემდეგ სააპელაციო საბჭოს უნდა მიმართოს. მათი თქმით, ავტორიზაციის საბჭო არ არის ვალდებული სააპელაციო პროცედურების გავლის გარეშე, სტუდენტთა მიღების შეზღუდვის გადაწყვეტილებას გადახედოს.

"შავი ზღვის საერთაშორისო უნივერსიტეტმა, უწინარეს ყოვლისა, უნდა მიმართოს სააპელაციო საბჭოს და წარმოადგინოს მყარი არგუმენტები ბიზნეს პროცესის უწყვეტობის, ინსტიტუციური მდგრადობის და სტანდარტებით გათვალისწინებული სხვა მოთხოვნების შესახებ, რათა მაქსიმალურად იქნას დაცული სტუდენტთა უფლებები", - წერია განცხადებაში.

შავი ზღვის საერთაშორისო უნივერსიტეტს სტუდენტების მიღების უფლება ერთი წლის ვადით შეეზღუდა. უმაღლესი საგანმანათლებლო დაწესებულებების ავტორიზაციის საბჭოს მიერ 2018 წლის 20 აგვისტოს მიღებული გადაწყვეტილებით, მიუხედავად იმისა, რომ სასწავლებელს ავტორიზაცია 6 წლით გაუგრძელდა, ისინი წელს სტუდენტებს ვერ მიიღებენ. საქართველოს განათლების სამინისტროს განცხადებით, იმ აბიტურიენტებისთვის, რომლებსაც შავი ზღვის საერთაშორისო უნივერსიტეტში ჩაბარება სურთ, რიგგარეშე მობილობა გამარტივებული წესით გამოცხადდება.

უნივერსიტეტის საზოგადოებასთან ურთიერთობის სამსახურის ცნობით, შავი ზღვის საერთაშორისო უნივერსიტეტს 2013 წელს საგადასახადო ჯარიმა, 700 ათასი ლარი დაეკისრა, რის გამოც უნივერსიტეტის ქონებას ყადაღა დაედო.

განათლების ხარისხის განვითარების ეროვნული ცენტრის განმარტებით, ფინანსურმა პრობლემებმა, რომელთა წინაშეც შავი ზღვის უნივერსიტეტი დგას, შესაძლოა სასწავლო პროცესები სერიოზული რისკების წინაშე დააყენოს. IBSU-ს პოზიციით კი საბჭოს გადაწყვეტილება არაადეკვატური, უსაფუძვლო და უსამართლოა.

IBSU-ს რექტორის, ილიას ჩილოღლუს განცხადებით, უნივერსიტეტმა 26 აგვისტოს 715 ათასი ლარის ოდენობის ჯარიმა გადაიხადა. რექტორმა მოუწოდა ცენტრს, გააბათილოს გადაწყვეტილება და მათ 27 აგვისტომდე მისცა დრო, რათა აბიტურიენტებს უნივერსიტეტში სწავლის საშუალება მისცენ.