შესწორება: სტატიის თავდაპირველ სათაურში ნათქვამი იყო, რომ შავი ზღვის საერთაშორისო უნივერსიტეტს ავტორიზაცია შეუჩერდა. უნივერსიტეტს ავტორიზაცია არ შეჩერებია, 6 წლის ვადით გაუგრძელდა, თუმცა სტუდენტების მიღება ერთი წლით შეუზღუდეს.

"ავტორიზაციის საბჭომ შავი ზღვის საერთაშორისო უნივერსიტეტს სტუდენტების ახალი ნაკადის მიღება ერთი წლით უსამართლოდ შეუზღუდა", - ამის შესახებ უნივერსიტეტის მიერ გავრცელებულ განცხადებაშია ნათქვამი.

როგორც On.ge-ს შავი ზღვის საერთაშორისო უნივერსიტეტის საზოგადოებასთან ურთიერთობის სამსახურში განუცხადეს, ავტორიზაციის საბჭოს გადაწყვეტილება საჯაროდ ჯერ არ გამოქვეყნებულა, თუმცა სხდომაზე ხმათა უმრავლესობის გადაწყვეტილებით უნივერსიტეტი 2018 წელს სტუდენტების ნაკადის მიღებას ვერ შეძლებს.

უნივერსიტეტის ინფორმაციით, შავი ზღვის საერთაშორისო უნივერსიტეტს ავტორიზაციის მიზნით, 24-27 აპრილს ეწვია ექსპერტთა ჯგუფი, რომელსაც ხელმძღვანელობდა განათლების დარგში საერთაშორისო ექსპერტი გაერთიანებული სამეფოდან, პროფესორი ენდი გიბსი.

“დოკუმენტაციის ანალიზისა და ფაქტობრივი გარემოებების შესწავლის შედეგად, ექსპერტთა ჯგუფმა მოამზადა დასკვნა, რომლის მიხედვითაც უნივერსიტეტი აკმაყოფილებს ავტორიზაციის სტანდარტებს: შვიდი სტანდარტიდან (19 ქვესტანდარტი) უარყოფითად არცერთი შეფასებულა", - აცხადებენ შავი ზღვის უნივერსიტეტში.

ამავე განცხადებაში ვკითხულობთ, რომ ავტორიზაციის საბჭოს 2018 წლის 20 აგვისტოს გადაწყვეტილებით, შავი ზღვის საერთაშორისო უნივერსიტეტს მიენიჭა ავტორიზაცია 6 წლის ვადით; ამავდროულად, საბჭომ მიიღო გადაწყვეტილება და უნივერსიტეტს 2019 წლის 20 აგვისტომდე სტუდენტთა ნაკადის მიღება შეუჩერა.

"შედეგად, 800-მდე სტუდენტის არჩევანი, ესწავლათ შავი ზღვის საერთაშორისო უნივერსიტეტში, იგნორირებულ იქნა, საბჭომ ისინი აიძულა გადანაწილებულიყვნენ სხვა უმაღლეს სასწავლებლებში. ეს გადაწყვეტილება საფრთხეს უქმნის სტუდენტების მიღებას, ფაქტობრივად, ორი წლის განმავლობაში მოქმედი კანონმდებლობის მიხედვით", - ნათქვამია განცხადებაში.

უნივერსიტეტის საზოგადოებასთან ურთიერთობის სამსახურის ცნობით, ავტორიზაციის საბჭოს გადაწყვეტილების გაცხადებული მიზეზი ისაა, რომ შავი ზღვის საერთაშორისო უნივერსიტეტს 2013 წელს დაეკისრა საგადასახადო ჯარიმა (ჯარიმის ოდენობა ამჟამად 700 000 ლარია და მისი სამართლიანობის შესახებ მიმდინარეობს სასამართლო დავა). ჯარიმიდან გამომდინარე, უნივერსიტეტის ქონებას ადევს ყადაღა.

"უნივერსიტეტი მზადაა სასამართლო დავის წაგების შემთხვევაში დაფაროს საგადასახადო ჯარიმა. ხაზგასასმელია, რომ შემოსავლების სამსახურის 2018 წლის 4 ივნისის ბრძანებით (#025-152) გაუქმდა უნივერსიტეტის ქონებაზე დადებული ყადაღა. აღნიშნული დოკუმენტი ავტორიზაციის საბჭოს წარედგინა, თუმცა საბჭომ ეს ფაქტობრივი მდგომარეობა არ გაითვალისწინა", - ნათქვამია განცხადებაში.

IBSU-ში მიაჩნიათ, რომ საბჭოს პოზიცია არის უსაფუძვლო და უსამართლო შემდეგი მიზეზების გამო:

  • შავი ზღვის საერთაშორისო უნივერსიტეტის უძრავი ქონება და სხვა აქტივები მრავალჯერ აღემატება 700 000 ლარს;
  • ავტორიზაციის საბჭოს მიერ მიღებული გადაწყვეტილება მხოლოდ მიმდინარე წელს 2 მილიონ ლარამდე ამცირებს უნივერსიტეტის შემოსავალს (რაც მრავალფეროვან საგანმანათლებლო მიზნებს მოემსახურებოდა).

უნივერსიტეტის ადმინისტრაცია გადაწვეტილების ადეკვატურობას კითხვის ნიშნის ქვეშ აყენებს და ინტერესდება, ადეკვატურია თუ არა უნივერსიტეტისათვის შემოსავლის შეზღუდვა მაშინ, როცა, საბჭოს მოსაზრებით, უნივერსიტეტის მთავარი პრობლემა სწორედ მატერიალური არასტაბილურობაა.

"ავტორიზაციის საბჭო იგნორირებას უკეთებს და ეჭვქვეშ აყენებს თავისივე ადგილობრივი და უცხოელი ექსპერტების კვალიფიციურ შეფასებას", - ნათქვამია განცხადებაში.

შავი ზღვის უნივერსიტეტის განცხადებით, ავტორიზაციის საბჭომ გადაწყვეტილება მიიღო, რითაც აფერხებს უნივერსიტეტის განვითარებას.

"მივმართავთ არასამთავრობო სექტორსა და საერთაშორისო ორგანიზაციებს, დიპლომატიურ კორპუსსა და მთლიანად სამოქალაქო საზოგადოებას, მხარი დაუჭირონ შავი ზღვის საერთაშორისო უნივერსიტეტს უსამართლობასთან ბრძოლაში", - ვკითხულობთ განცხადებაში.

უნივერსიტეტის ადმინისტრაცია საქართველოს მთავრობას მოუწოდებს, მიიღოს შესაბამისი ზომები.

On.ge დაუკავშირდა ხარისხის განვითარების ცენტრის პრესსამსახურს და მათ განმარტებას ინფორმაციის მიღებისთანავე შემოგთავაზებთ.