შენების მოძრაობის ლიდერის დავით უსუფაშვილი საქართველოს პრეზიდენტს, გიორგი მარგველაშვილსა და პარტია ქართული ოცნების პოლიტსაბჭოს თავმჯდომარეს, ბიძინა ივანიშვილმს მიმართავს და მოუწოდებს შეძლონ მოლაპარაკება უზენაესი სასამართლოს თავმჯდომარეობის კანდიდატზე.

"მარგველაშვილმა და ივანიშვილმა ხუთწლიანი "ცივი ომის" უკანასკნელ დღეებში მაინც უნდა შეძლონ ერთობლივი სახელმწიფოებრივი ნაბიჯების გადადგმა და უზენაესი სასამართლოს თავმჯდომარედ მაღალი საზოგადოებრივი და პოლიტიკური ლეგიტიმაციის მქონე პროფესიონალის არჩევა", - წერს დავით უსუფაშვილი ფეისბუკის გვერდზე.

მისი თქმით, უზენაესი სასამართლოს თავმჯდომარის არჩევის პროცესში მმართველი პარტიის მონდომება უფრო მაღალი უნდა იყოს.

"თუ საჭიროა, მარგველაშვილმა უნდა გაიხსენოს ივანიშვილის ტელეფონის ნომერი და, თუ საჭიროა, ივანიშვილმა უნდა შეწყვიტოს დასვენება პროცესის ხელშესაწყობად.რა ჩემი საქმეა, რა უნდა ქნან მარგველაშვილმა და ივანიშვილმა? ეს ყველას საქმეა და ჩემი საქმეცაა! მართლმსაჯულების სისტემის გაჯანსაღების გზაზე დაყენების შანსის გამოსაყენებლად უმაღლესი სახელმწიფო ძალაუფლებით აღჭურვილი პირებისგან, დიახაც, მოვითხოვთ უმაღლეს პასუხისმგებლობას, ნებისყოფას და გამჭრიახობას", - განაცხადა დავით უსუფაშვილმა.

უზენაესი სასამართლოს თავმჯდომარე ნინო გვენეტაძე 2018 წლის 2 აგვისტოს გადადგა. როგორც უზენაესი სასამართლოს განცხადებაშია ნათქვამი, მისი გადადგომა ჯანმრთელობის მდგომარეობას უკვაშირდება, რომელიც საზღვარგარეთ რამდენიმეთვიან მკურნალობას მოითხოვს. კანდიდატთან დაკავშირებით პრეზიდენტის ადმინისტრაციამ კონსულტაციები რამდენჯერმე გამართა.

უზენაესი სასამართლოს თავმჯდომარის შერჩევის ფორმატზე პრეზიდენტი და სამოქალაქო სექტორი ვერ შეთანხმნენ. გიორგი მარგველაშვილის შეთავაზება, რომ კანდიდატი არასამთავრობო ორგანიზაციებს შეერჩიათ, პრეზიდენტს კი პარლამენტისთვის წარედგინა, სამოქალაქო სექტორისთვის მიუღებელი აღმოჩნდა.