საქართველოს პეზიდენტმა, გიორგი მარგველაშვილმა დღეს, 20 აგვისტოს გამართულ შეხვედრაზე არასამთავრობო სექტორს შესთავაზა, რომ უზენაესი სასამართლოს თავმჯდომარეობის კანდიდატი, პრეზიდენტის ნაცვლად, პროფესიულმა ჯგუფებმა წარმოადგინონ. არასამთავრობო ორგანიზაციების ნაწილი მიიჩნევს, რომ ეს მხოლოდ პრეზიდეტის პრეროგატივაა.

"ჩვენ უარი არ გვითქვამს კიდევ ერთხელ იმაზე, რომ ჩვენი მოსაზრებები მივაწოდოთ კონკრეტულ კანდიდატებთან მიმართებაში თუკი პრეზიდენტი ამ კანდიდატს უკვე შეარჩევს", - განაცხადა შეხვედრის შემდეგ საერთაშორისო გამჭვირვალობა - საქართველოს აღმასრულებელმა დირექტორმა, ეკა გიგაურმა ჟურნალისტებთან საუბრისას.

სოფო ვერძეულმა, EMC-ის მართლმსაჯულებისა და დემოკრატიის პროგრამის დირექტორმა განაცხადა, რომ პრეზიდენტის შეთავაზების გათვალისწინება მიზანშეწონილ არაა და მათ ამ ფორმატზე შეთავაზება არ გაიზიარეს.

"დროის და სხვა საკითხების გათვალისწინებით, ახლა არ არის მიზანშეწონილი პროფესიული ჯგუფების მხრიდან დაფორმირდეს რაღაც ჯგუფი, რომელიც შესაძლო კანდიდატებთან გასაუბრების თუ სხვა შერჩევის ფორმების გამოყენების გზით შეარჩევს კანდიდატს, რომელსაც მერე ტექნიკურად პრეზიდენტი წარადგენს პარლამენტში", - აღნიშნა ვერძეულმა.

პრეზიდენტის მრჩეველი ადამიანის უფლებებისა და მართლმსაჯულების საკითხებში, კახა კოჟორიძე ამბობს, რომ პრეზიდენტი უახლოეს მომავალში ამ საკითხზე გადაწყვეტილებას საზოგადოებას თავად აუწყებს.

უზენაესი სასამართლოს თავმჯდომარე ნინო გვენეტაძე 2018 წლის 2 აგვისტოს გადადგა. როგორც უზენაესი სასამართლოს განცხადებაშია ნათქვამი, მისი გადადგომა ჯანმრთელობის მდგომარეობას უკვაშირდება, რომელიც საზღვარგარეთ რამდენიმეთვიან მკურნალობას მოითხოვს. კანდიდატთან დაკავშირებით პრეზიდენტის ადმინისტრაციამ კონსულტაციები რამდენჯერმე გამართა.