რუსეთის სახელმწიფო საინფორმაციო სააგენტო RIA-ს ინფორმაციით, ბოლო პერიოდში საბერძნეთი რუს სასულიერო პირებს ვიზებს არ აძლევს. ამის მიზეზად კი თვითონ მღვდლები რუსეთსა და საბერძნეთს შორის დაძაბულ ურთიერთობას ასახელებენ.

ივლისში საბერძნეთმა რუსეთი ქვეყნის საქმეებში ჩარევაში დაადანაშაულა და ორი რუსი დიპლომატი გააძევა. საქმე ეხება საბერძნეთი-მაკედონიის შეთანხმებას, რომლის მიხედვითაც მაკედონიას "ჩრდილოეთ მაკედონიის რესპუბლიკა" დაერქმევა. სახელის შეცვლის სანაცვლოდ კი საბერძნეთი ევროკავშირსა და ნატოსკენ მაკედონიის სვლას ხელს არ შეუშლის. საბერძნეთი აცხადებდა, რომ რუსეთი ამ შეთანხმების ჩაშლას ცდილობდა.

ერთ-ერთ სასულიერო პირი ყვება, რომ ოჯახთან ერთად საბერძნეთში სურდა გამგზავრება და, მათ შორის, ათონის მთაზე რამდენიმე დღის გატარება. მისივე თქმით, საბერძნეთის საკონსულომ მის ცოლსა და ექვს შვილს ვიზა მისცა, მას კი - არა.

"მე უარი მომივიდა, თითქოს საბერძნეთის ტერიტორიაზე ყოფნის საფუძველი არ არსებობს, მიუხედავად იმისა, რომ ბილეთები ნაყიდია და მთელი ტური სრულად გადახდილი", - ყვება ვასილი ბიკსეი.

საბერძნეთის საკონსულომ შეზღუდული დროით ვიზა მისცა საპატრიარქოს პრესსამსახურის ყოფილ უფროსს, ვლადიმერ ვიგილიანსკის. სასულიერო პირის თქმით, მის ცოლს სამწლიანი ვიზა მისცეს, ხოლო მას სამთვიანი მაშინ, როცა საბერძნეთში არაერთ კონფერენციასა და საეკლესიო საქმიანობაში მიუღია მონაწილეობა. მისივე განმარტებით, მსგავსი ისტორიები მას სხვა სასულიერო პირებისგანაც სმენია.