შინაგან საქმეთა მინისტრმა, გიორგი გახარიამ დღეს, 13 ივნისს პარლამენტში მთავრობის ახალი შემადგენლობის მოსმენისას, ენმ-ის წევრის, ნიკა მელიას კითხვას უპასუხა, 13 ივნისს ინტერპოლით ძებნილის დაკავების საქმეზე.

საქმე ეხება ძებნილ პირს, რომელიც ზაზა სარალიძის მხარდამჭერ აქციაზე პარლამენტის წინ დააკავეს. თუმცა, პოლიციამ დაკავებამდე რამდენიმე დღით ადრე 500-ლარიანი ჯარიმა გამოუწერა. ამაზე გიორგი გახარიამ განმარტა, რომ პატრულ-ოფიცერმა, როდესაც გააჩერა, მის მობილურ ბაზაში ინტერპოლის ძებნილის ბაზა არ იყო ინტეგრირებული:

"დღესაც არაა და ვასწორებთ. ამიტომ გაუშვა".

ბესლან ლორსანოვი წითელ ხიდთან დაუმორჩილებლობისათვის დაჯარიმდა. ლორსანოვი მაშინ სამართალდამცველებს არ დაუკავებიათ იმის მიუხედავად, რომ მას ყაზახეთი ინტერპოლის წითელი ცირკულარით ეძებდა. აქციაზე დაკავების შემდეგ კი შსს-მ განაცხადა, რომ ლორსანოვს 7 წელია ეძებენ და ის განსაკუთრებით საშიში დამნაშავეა.