იუსტიციის მინისტრობის კანდიდატმა, თეა წულუკიანმა გუშინ, 19 ივნისს გაერთიანებული კომიტეტების სხდომაზე მის მიმართ გაჟღერებულ კრიტიკას უპასუხა. წულუკიანის თქმით, ბრალდება იმის შესახებ, რომ იუსტიციის მინისტრი ორ სასამართლო გადაწყვეტილებას არ ასრულებდა სიცრუეა.

წულუკიანი გამოეხმაურა ევროპული საქართველოს წევრის, ოთო კახიძის განცხადებასაც, რომელმაც დაასახელა 10 მიზეზი თუ რატომ არ უნდა იყოს თეა წულუკიანი მინისტრი:

"რაც შეეხება ბატონ ოთარ კახიძეს, მან თქვა არგუმენტი იმის შესახებ, რომ მე მისი მოსაწონი ვერ ვიქნები... ამჟამად არის მისთვის მოსაწონი "ორი გვამი მომიტანე" მერაბიშვილი და იბრძვის მისი გათავისუფლებისთვის. მაგრამ ეს გათავისუფლება სამწუხაროდ ვერ ხდება და ვერ მოხდება."

გაერთიანებული კომიტეტის სხდომაზე ოპოზიციის კითხვების მთავარი ადრესატი შინაგან საქმეთა მინისტრობის კანდიდატ გიორგი გახარიასთან ერთად თეა წულუკიანი იყო. ოპოზიციის დეპუტატებს აინტერესებდათ დარჩება თუ არა წულუკიანი ახალ მთავრობაში, როცა საზოგადოება მის გადადგომას ითხოვს.

სხდომაზე იმყოფებოდნენ დანაშაულის პრევენციის ცენტრიდან გათავისუფლებული ანა სუბელიანი და თამაზ ახობაძე. წულუკიანმა განაცხადა, რომ მათი აღდგენა არ მოხერხდა ვინაიდან "ფულზე ვაჭრობა" დაიწყეს. ახობაძემ და სუბელიანმა მინისტრი ტყუილში დაადანაშაულეს, რის შემდეგაც მათ სხდომათა დარბაზი დაატოვებინეს.

პრემიერობის კანდიდატმა, მამუკა ბახტაძემ ამ კითხვას არ უპასუხა და განაცხადა, რომ ახალ მთავრობაზე 2 ან 3 კვირაში გახდება ცნობილი. თეა წულუკიანის თქმით, სულერთია იქნება თუ არა ახალი მთავრობის შემადგენლობაში, ის მაინც დარჩება ქართული ოცნების თანამებრძოლად.

თავდაპირველად, თეა წულუკიანის იუსტიციის მინისტრის პოსტიდან გადადგომა 16-მა არასამთავრობო ორგანიზაციამ მოითხოვა. გადადგომის მოთხოვნა დღის წესრიგში მას შემდეგ დადგა, რაც ყოფილ მთავარ პროკურორს ირაკლი შოთაძეს იუსტიციის მინისტრმა გაწეული საქმიანობისთვის მადლობა გადაუხადა და მხარდაჭერა აღუთქვა, მიუხედავად იმისა, რომ შოთაძის გადადგომის მიზეზი ხორავას ქუჩის საქმეზე გამოტანილი განაჩენი იყო.

არასამთავრობოების მოთხოვნას ყოფილი პრემიერი გიორგი კვირიკაშვილი გამოეხმაურა, წულუკიანის გადადგომის მოთხოვნას აბსურდული უწოდა და არასამთავრობო სექტორი პოლიტიკურ დღის წესრიგში დაადანაშაულა.

ამ პროცესების შემდეგ, მოქალაქეების ნაწილმა იუსტიციის სამინისტროსთან აქცია გამართა სახელწოდებით: "თეა წადი". არასამთავრობოებისა და მოქალაქეების პოზიცია გაიზიარა საქართველოს პრეზიდენტმა გიორგი მარგველაშვილმა და განაცხადა, რომ წულუკიანის გადადგომის მოთხოვნა ლეგიტიმური იყო. თავად წულუკიანმა კი განაცხადა, რომ თანამდებობას მხოლოდ გუნდის გადაწყვეტილების საფუძველზე დატოვებს.