საქართველოს პრემიერ-მინისტრი გიორგი კვირიკაშვილი ეხმაურება არასამთავრობოების ნაწილის მოთხოვნას, რომლებიც იუსტიციის მინისტრის, თეა წულუკიანის გადადგომას ითხოვენ.

პრემიერის თქმით, ხელისუფლება მთავარი პროკურორის შერჩევის პროცესში მაქსიმალურად ფართო საზოგადოებრივ ჩართულობას უზრუნველყოფს.

პრემიერის განმარტებით, ეს ნიშნავს იმას, რომ ამ პროცესში საზოგადოების, აკადემიური წრეების, არასამთავრობო სექტორის წარმომადგენლები მიიღებენ მონაწილეობას.

"მიუღებელია, რომ არასამთავრობოების ნაწილი, ულტიმატუმის ენით გვესაუბრება და ცდილობს, ბოიკოტის გამოცხადებით ეჭვქვეშ დააყენოს პროცესის ლეგიტიმაცია. მათ განცხადებებში იკვეთება საკითხის პოლიტიკურ ჭრილში გადატანის მცდელობა, რაც ასევე სრულიად მიუღებელია", - განაცხადა პრემიერმა.

ის მოუწოდებს არასამთავრობოებს, რომ არ გასცდნენ საკუთარი საქმიანობის მანდატს.

"თუ მათი მიზანი მართლაც პროცესის გამჭვირვალედ წარმართვაა, მეტი პასუხისმგებლობით მიუდგნენ თავიანთ გადაწყვეტილებებს", - განაცხადა პრემიერმა.

კვირიკაშვილის თქმით, თეა წულუკიანის გადადგომის მოთხოვნა სრულიად აბსურდული და გონივრულ საფუძველს მოკლებულია.