საქართველოს პრეზიდენტი გიორგი მარგველაშვილი უერთდება არასამთავრობოების მოწოდებას იუსტიციის მინისტრის თეა წულუკიანის გადადგომის შესახებ.

მისი თქმით, მან მოისმინა საინტერესო და ნათელი განცხადებები ამ საკითხთან დაკავშირებით და მიაჩნია, რომ მოთხოვნა ადეკვატურია.

"მე ვფიქრობ, რომ იუსტიციის მინისტრი უნდა გადადგეს. თუ ახალი პროკურორის შერჩევას სჭირდება საზოგადოების ლეგიტიმაცია და არასამთავრობო სექტორი ლეგიტიმაციის რაღაც ნაწილს წარმოადგენს, გამეხარდა, რომ პირობა დააყენეს. ძალიან კარგია, რომ მორალური თამასა აწიეს და თქვეს, რომ ჩვენ იმ ადამიანთან, რომელსაც ბევრ შეცდომა აქვს დაშვებული, არ დავსხდებით. მორალური კრიტერიუმით საუბარი ხელისუფლებასთან არის სწორი", - განაცხადა პრეზიდენტმა ტელეკომპანია პირველის ეთერში.

გიორგი მარგველაშვილმა დააზუსტა თავისი პასუხი თეა წულუკიანის გადადგომის მოთხოვნასთან დაკავშირებით და თქვა, რომ მისი პასუხი არის თანხმობა საზოგადოებაში არსებულ პათოსთან, რომელსაც გააჩნია ლოგიკური არგუმენტაცია.

არასამთავრობო სექტორი საქართველოს იუსტიციის მინისტრის გადადგომას მოითხოვს. მათ პოზიციას უერთდებიან მოქალაქეებიც. დღეს, 8 ივნისს, თეა წულუკიანის გადადგომის მოთხოვნით იუსტიციის სახლთან აქცია გაიმართა.