საპატრულო პოლიციის დეპარტამენტის დირექტორმა თეიმურაზ კუპატაძემ რუსთაველის გამზირზე აქციის მიმდინარეობის დროს მომხდარ ინციდენტთან დაკავშირებით ჟურნალისტებს განუცხადა, რომ ამ ეტაპზე არ იგეგმება ზვიად კუპრავას დაკავება:

"თუ ამის საჭიროება იქნება, ამას მომავალში თქვენ თვითონ ნახავთ".

თეიმურაზ კუპატაძის განცხადებას შსს ავრცელებს, სადაც ნათქვამია, რომ აქციის მონაწილეებსა და ორგანიზატორებს შორის ხვალინდელ გეგმებთან დაკავშირებით მოხდა გარკვეული შეხლა-შემოხლა:

"ვერ გაარკვიეს, თუ როგორ უნდა იმოქმედონ და რა სამოქმედო გეგმები ექნებათ ხვალ. მოვიდა პიროვნება, რომელიც მოუწოდებდა რომ გაეყვანათ პოლიტიკური პარტიები და თავისუფალი აზრის გამოხატვის უფლება მისცემოდა ყველა მოქალაქეს პოლიტიკური მოსაზრებების გარეშე. ამასთან დაკავშირებით ბატონ ზვიად კუპრავასთან მოუვიდათ შეხლა-შემოხლა, რაც განმუხტული იყო ჩვენი მხრიდან. ჩვენ აქ ვიმყოფებით, რომ დავიცვათ საზოგადოებრივი წესრიგი, მართლწესრიგი და საპატრულო პოლიცია 24 საათის განმავლობაში აკონტროლებს აქციას და აქციის მონაწილეების უსაფრთხოებას იცავს.
მე ვერ გეტყვით რა ხდებოდა კარავში, მაგრამ ხმა გამოდიოდა. რამდენიმე ნასვამი პიროვნება იყო კარავში, რომელსაც სჭირდებოდა სასწრაფო-სამედიცინო დახმარება. ჩვენ შევიყვანეთ ექიმები და შესაბამისი დახმარება აღმოუჩინეს ამ ადამიანებს. მომხდარ ფაქტზე დაკავებულები არ არიან".

დღევანდელი აქციის ბოლოს, ხორავას ქუჩაზე მოკლული არასრულწლოვნის მამამ, ზაზა სარალიძემ თქვა, რომ თუ აქამდე მხოლოდ საზოგადოებას სთხოვდა გვერდში დგომას, ახლა ყველა პოლიტიკურ პარტიას მოუწოდებს, გაერთიანდნენ სისტემის დასანგრევად.

პარლამენტიდან ედპ-ს შენობისკენ აქციის მონაწილეების ნაწილმა ზვიად კუპრავასთან ერთად გადაინაცვლა. იქ ის სხვადასხვა ოპოზიციური პარტიის წარმომადგენლებს შეხვდა და როგორც მათ განმარტეს, სამომავლო გეგმები უნდა დაესახათ. შეკრებაზე მივიდა გიორგი ვაშაძე, რომელმაც განაცხადა, რომ ვინც კი თავს ოპოზიციურ პარტიად მიიჩნევს, ყველა იქ უნდა მივიდეს და ერთად შეცვალონ ხელისუფლება.

ენმ-ის წევრი ზვიად კუპრავა სხვა პოლიტიკოსებთან ერთად უკვე დაბრუნდა პარლამენტის შენობასთან. მასთან ერთად არიან პარტია სახელმწიფო ხალხისთვის, პარტია ახალი საქართველოსა და ეროვნულ დემოკრატიული პარტიის ლიდერები.