პატიმართა გათავისუფლება და ჰუმანიტარული მისიების ეფექტიანი განხორციელება კონფლიქტურ რეგიონებში, აფხაზეთისა და სამხრეთი ოსეთის ადამიანის უფლებათა დამცველებსა და სამოქალაქო საზოგადოების აქტივისტებს შორის მშვიდობიანი ურთიერთობების ჩამოყალიბება - ეს ის საკითხებია, რაზეც დღეს, 24 მარტს სახალხო დამცველმა ჟენევაში გამართულ ადამიანის უფლებათა ეროვნული ინსტიტუტების გლობალური ალიანსის შეხვედრაზე ისაუბრა.

მოხსენებაში ომბუდსმენმა იმ დოკუმენტსაც გაუსვა ხაზი, რომლითაც საქართველოს, აფხაზეთისა და სამხრეთ ოსეთის დე-ფაქტო ხელისუფლებებმა შეთანხმებას, პრინციპით ყველა-ყველაზე მიაღწიეს.

უჩა ნანუაშვილმა განაცხადა, რომ ომბუდსმენი აქტიურად მონაწილეობს კონფლიქტურ რეგიონებში ადამიანის უფლებათა დამცველებსა და სამოქალაქო აქტივისტებს შორის ურთიერთობის ჩამოყალიბებაზე. მისი თქმით, სწორედ მათთან ერთად საუბრობენ კონფლიქტით დაზარალებულ მოსახლეობაში არსებულ საჭიროებებსა და ადამიანის უფლებების მდგომარეობაზე:

"კონფლიქტით დაზარალებულ ახალგაზრდებს ვუტარებთ ტრენინგებს და სამოქალაქო საზოგადოებას ინფორმაციას ვაწვდით ადამიანის უფლებათა დაცვის სტანდარტებზე".

სახალხო დამცველმა ასევე აღნიშნა, რომ აფხაზეთისა და სამხრეთ ოსეთის ტერიტორიაზე ჰუმანიტარული მისისების ეფექტურ მუშაობას დიდი მნიშვნელობა აქვს. მისი თქმით, ასეთი მისისებისა და უფლებადაცვითი ორგანიზაციების საქმიანობა არც რუსეთის მთავრობის და არც ადგილობრივი დე-ფაქტო ხელისუფლების ინტერესებში შედის:

"მე კიდევ ერთხელ მინდა მოვუწოდო საერთაშორისო უფლებადაცვით ორგანიზაციებს დაფიქრდნენ, თუ როგორ უნდა უზრუნველყონ კონფლიქტურ რეგიონებში ადამიანის უფლებების დაცვა“.

ადამიანის უფლებათა ეროვნული ინსტიტუტების გლობალური ალიანსის შეხვედრაში მონაწილეობა მიიღო სხვადასხვა ქვეყნის 100 მდე ორგანიზაციის წარმომადგენელმა. 2016 წლის 22 მარტს საქართველოს სახალხო დამცველი გლობალური ალიანსის ბიუროს სრულუფლებიან წევრად აირჩიეს.