რკინიგზელთა ახალი პროფესიული კავშირის ინფორმაციით, მეტროს მემანქანეების გაფიცვის პერიოდში, თბილისის სატრანსპორტო კომპანია გეგმავს შტრეიკბეხერების სახით, გაფიცული მემანქანეები ჩაანაცვლოს საქართველოს რკინიგზის ელმავლის მემანქანეებითა და მათი თანაშემწეებით.

რკინიგზელთა პროფკავშირის ცნობით, დღევანდელი მდგომარეობით დაუგეგმავ შვებულებას იყენებს და მეტროს მემანქანის პროფესიის გადამზადების კურსს გადის 7 საქართველოს რკინიგზის ელმავლის მემანქანე.

"ზემოთ ჩამოთვლილი არც ერთი მემანქანე საქართველოს რკინიგზელთა ახალი პროფესიული კავშირის წევრი არ არის და მეტიც, ისინი წარმოადგენენ რკინიგზაში მოქმედ, მეორე, ადმინისტრაციის მიერ მართულ - ყვითელ პროფკავშირს", - ნათქვამია რკინიგზის პროფკავშირების განცხადებაში.

რკინიგზელთა პროფკავშირები მოუწოდებს მის წევრ მემანქანეებს და რკინიგზაში დასაქმებულ სხვა მუშაკებს, არ გახდნენ მშრომელთა ბრძოლის წინააღმდეგ იარაღი.

"თუ დაფიქსირდება ჩვენი წევრი, საქართველოს რკინიგზის თანამშრომელთა გამოყენება მეტროს მემანქანეების სამართლიანი ბრძოლის წინააღმდეგ, საქართველოს რკინიგზელთა ახალი პროფესიული კავშირი განიხილავს რკინიგზელების მეტროს მემანქანეთა სოლიდარობის მიზნით გაფიცვის დაწყების შესაძლებლობას", - ნათქვამია განცხადებაში.

ერთობა 2013-ის თავმჯდომარის რატი კაპანაძის თქმით, ისინი არ ფლობენ ინფორმაციას, ხდება თუ არა მემანქანეების მობილიზება მათი გაფიცვით გამოწვეული კრიზისის თავიდან ასაცილებლად. თუმცა განმარტავს, რომ ეს ინფორმაცია მათ პროტესტს ვერ შეაჩერებს.

თბილისის სატრანსპორტო კომპანიაში On.ge-ს რკინიგზელთა პროფესიული კავშირების მიერ გავრცელებული ინფორმაცია არ დაუდასტურეს. კომპანიის პრესსამსახურის წარმომადგენლის ლელა სეთურიძის თქმით, კომპანიასა და რკინიგზას შორის არანაირი მოლაპარაკება მემანქანეების გადამზადებასთან დაკავშირებით არ ყოფილა.

ლელა სეთურიძემ დამატებით განგვიმარტა, რომ სატრანსპორტო კომპანიაში ფუნქციონირებს ტექნიკური სკოლა,რომელიც ამზადებს მემანქანეებს. ამ სკოლაში ყოველთვიურად იღებენ მეტროს მემანქანეობის მსურველ პირებს, რომლებიც ერთი თვის განმავლობაში, როგორც თეორიულ ისე პრაქტიკულ სწავლებას გადიან. პირები, რომლებიც ტექნიკურ სკოლას ამთავრებენ ან საქმდებიან ან ე.წ. რეზერვის ჯგუფში ეწერებიან.

ერთობა 2013-ის თავმჯდომარის რატი კაპანაძის განმარტებით, თეორიული კურსის დასრულების შემდეგ, პრაქტიკული ნაწილი ტექნიკური სკოლის მონაწილეებმა მათი დახმარებით უნდა გაიარონ, რაზეც უარს აცხადებენ.

"ჩვენ მათ პრაქტიკულ გადამზადებაზე უარს ვამბობთ, ისინი პრაქტიკულ კურსს ვერ გაივლიან", - განუმარტა On.ge-ს რატი კაპანაძემ.

რატი კაპანაძის თქმით, სატრანსპორტო კომპანია კიდევ ერთხელ ცდება და სრულიად არაადეკვატურ გადაწყვეტილებებს იღებს.

მემანქანეთა გაფიცვა

შპს თბილისის სატრანსპორტო კომპანიასთან კოლექტიური შრომითი დავა რამდენიმე თვეა მიმდინარეობს, რომლის ფარგლებში მიმდინარე მოლაპარაკებების წარუმატებლობის გამო, მეტროს თანამშრომლებმა კანონმდებლობით დადგენილი წესით 2018 წლის 3 მაისს გაფიცვა დააანონსეს, რომელიც თბილისის საქალაქო სასამართლოს მიერ 30 დღის ვადით 2018 წლის 3 ივნისამდე გადაიდო.

2018 წლის 21 მაისს თბილისის საქალაქო სასამართლომ, ამჯერად განუსაზღვრელი ვადით შეზღუდა პროფესიულ გაერთიანების წევრი მეტროს მემანქანეების გაფიცვაში მონაწილეობის მიღების უფლება "სამუშაო საათების განმავლობაში"