Ria novosti-ის ინფორმაციით, რუსეთის დუმის საერთაშორისო საქმეთა კომიტეტის ხელმძღვანელმა, ალექსეი პუშკოვმა განაცხადა, რომ ამ ეტაპზე რუსეთი არ მიიჩნევს საჭიროდ, საქართველოსა და კიდევ 5 ქვეყანას პასუხი იმ გადაწყვეტილებაზე გასცეს, რომლითაც ეს სახელმწიფოები ევროკავშირის მიერ რუსეთის წინააღმდეგ დაწესებულ სანქციებს შეუერთდნენ:

"რუსეთი ამ ქმედებას მეგობრულ ნაბიჯად არ განიხილავს. ამასთან, ამ ეტაპზე საპასუხო ზომების მიღებას არ აპირებს".

მან ასევე განმარტა, რომ ზემოაღნიშნული ქვეყნების გადაწყვეტილებები მხოლოდ სინანულს იწვევს, თუმცა პრაქტიკული თვალსაზრისით, აღნიშნული ყირიმზე გავლენას ვერ მოახდენს:

"ეს, პირველ რიგში, პროპაგანდისტული და პოლიტიკური ნაბიჯია. ის საქართველოს ხელისუფლების იმ მისწრაფებით არის ნაკარნახევი, რომლითაც მას დასავლეთთან ერთიანობის დემონსტრირება სურს".

ამასთან მან აღნიშნა, რომ რუსეთს სურს, საქართველოსთან ეტაპობრივად დაალაგოს ურთიერთობა. მისი თქმით, ჩვენს ქვეყანაში არიან ძალები, რომლებიც ასევე არიან ამაში დაინტერესებულები და აღნიშნული კარგი იქნება ქართული ეკონომიკისთვისაც.

მან იმედი გამოთქვა, რომ საქართველოში საპარლამენტო არჩევნების შემდეგ, რუსეთ-საქართველოს ურთიერთობის ნორმალიზებისთვის უკეთესი საფუძველი შეიქმნება, მათ შორის ორი ქვეყნის პარლამენტებს შორის კონტაქტებისთვისაც, რომლებიც, პრაქტიკულად, გაყინულია:

"ქართველ პარლამენტარებთან ბოლოდროინდელი ურთიერთობისას, შეგვექმნა შთაბეჭდილება, რომ გარკვეული პოტენციალი ჩვენი ურთიერთობების გასაახლებლად არსებობს და რუსეთი ამისთვის მზადაა".

20 ივლისს, ევროკავშირის წარმომადგენელმა, ფედერიკა მოგერინიმ განაცხადა, რომ ორგანიზაციის გადაწყვეტილებას, ყირიმისა და სევასტოპოლის წინააღმდეგ დაწესებული სანქციები 2017 წლის 23 ივნისამდე გაგრძელდეს, კიდევ 6 ქვეყანა, მათ შორის საქართველოც შეუერთდა.

აღნიშნულის გამო რუსეთის სახელმწიფო დუმის საერთაშორისო საკითხებზე მომუშავე კომიტეტის წევრმა განაცხადა, რომ აღნიშნული ქმედებით საქართველომ რუსეთში ღვინისა და ბორჯომის ექსპორტის საკითხი საფრთხის ქვეშ დააყენა.

აბაშიძე: რუსეთში ჩვენი ღვინისა და ბორჯომის აკრძალვა დუმის ერთი კომიტეტის აზრია