საქართველოს ყოფილი პრეზიდენტი და ერთიანი ნაციონალური მოძრაობის ლიდერი, მიხეილ სააკაშვილი რუსთავი 2-ის ეთერში გასულ გიორგი გაბუნიას საავტორო გადაცემას ეხმიანება. გადაცემაში ნაჩვენები იყო ლია უკლებას ნახატი, სადაც ასახული იყო, როგორ იკლავს თავს ღვთისმშობელი პისტოლეტით.

"გიორგი გაბუნია არის ძალიან კარგი ჟურნალისტი, მაგრამ ამ ბოლო დღეებში, მისი გამოსვლა, სხვა არაფერი იყო, თუ არა დიდი შეცდომა და ჩავარდნა", - წერს მიხეილ სააკაშვილი ფეისბუქზე.

მისი თქმით, "უნდა გავუფრთხილდეთ ერთმანეთის გრძნობებს და თავი შევიკავოთ უაზრო წყენის მიყენებისგან". სააკაშვილს მიაჩნია, რომ საზოგადოებას უფლება აქვს მოითხოვოს საჯარო ბოდიში.

"ყველას უნდა ესმოდეს, რომ ზღვარგადასული არ ვარგა არაფერი. ღვთისმშობლის აგდებულად მოხსენება შეურაცხყოფს ყველა მორწმუნე ქრისტიანის გრძნობებს, ისევე როგორც საკუთარი დედის აუგად მოხსენიება. პირადად ჩემთვის, ეს იყო ძალიან უსიამოვნო სანახავი", - აღნიშნავს სააკაშვილი.

22 მაისს გიორგი გაბუნიამ არჩევანის ეთერში ცენზურაზე საუბრისას მხატვრის, ლია უკლებას ნამუშევარი თვითმკვლელი ღვთისმშობელი განიხილა. გაბუნიამ აღნიშნა, რომ ღვთისმშობელს ხელში სათამაშო თოფი უჭირავს და სინამდვილეში თავს ვერ მოიკლავს და ქრისტესაც მალე გააჩენს. ამას საზოგადოების ნაწილში პროტესტი მოყვა, მათ გაბუნიას გამოთქმა "რელიგიური გრძნობების" შეურაცხყოფად მიიღეს.

ამავე თემაზე: