სულ რამდენი ძუძუმწოვარი ცხოვრობს ჩვენს პლანეტაზე, რომელებიც ჯერ არ აღმოგვიჩენია? ერთი შეხედვით ამ კითხვაზე პასუხის გაცემა შეუძლებელია - როგორ უნდა დათვალო ის, რაც არ იცი? თუმცა, მკვლევარებმა სტატისტიკური ანალიზის შედეგად დაასკვნეს, რომ ჩვენს პლანეტაზე ჩვენთვის ჯერჯერობით უცნობი ძუძუმწოვრების 303 სახეობა ცხოვრობს.

ბოლო რამდენიმე საუკუნის განმავლობაში მეცნიერებმა 5 557 სახეობის ძუძუმწოვარი აღმოაჩინეს. მათ რიცხვში შედიან როგორც უზარმაზარი ლურჯი ვეშაპები, ასევე ფუტკრისხელა ღამურებიც. ძუძუმწოვრები დიდი ხანია მეცნიერთა ყურადღების ცენტრში არიან, რის გამოც შეიძლება ვიფიქროთ, რომ ახალი სახეობების აღმოჩენა შეუძლებელიც კია. ამის მიუხედავად, ფაქტები საპირისპიროზე მეტყველებს - ყოველწლიურად მეცნიერები ძუძუმწოვართა ახალი სახეობების შესახებ იგებენ. გაითვალისწინეთ, რომ აქ ლაპარაკი არაა მხოლოდ შორეულ ადგილებში მცხოვრებ პატარა ცხოველებზე, ხშირად საკმაოდ დიდ ახალ სახეობებსაც ვხვდებით (მაგალითად ვეშაპების კონკრეტული სახეობები).

ეკოლოგიისა და ევოლუციის ჟურნალში გამოქვეყნებული სტატიის ავტორის, მოლი ფიშერის თქმით, ცხოველების გადაშენების ზრდის გათვალისწინებითა და ჩვენი სამყაროს უკეთ გაცნობის სურვილის გამო ძალიან მნიშვნელოვნია ახალი სახეობების იქამდე პოვნა, სანამ ისინი გაქრებიან. აღმოსაჩენ მცენარეთა რაოდენობის შეფასებისათვის გამოყენებული სტატისტიკური ანალიზის მოდელი მეცნიერებმა ამჯერად ძუძუმწოვრებზე გამოიყენეს და 1760 წლიდან 2010 წლამდე აღმოჩენილი ცხოველების რაოდენობის ანალიზის შედეგად დაასკვნეს, რომ მომავალში კიდევ 303 სახეობის შესახებ შევიტყობთ.

კვლევის შედეგების მიხედვით, აღმოუჩენელი სახეობების დიდი ნაწილი სავარაუდოდ ჯუნგლებში ცხოვრობს. შესაძლო გეოგრაფიულ ადგილმდებარეობათა შორის მეორე ადგილზე კი პალეარქტიკული რეგიონია, რომელიც ევრაზიასა და ჩრდილოეთ აფრიკას მოიცავს.

"კვლევის შედეგები ბუნებრივად მიგვაჩნია, ვინაიდან ტროპიკული ჯუნგლები ყველაზე ცუდად გამოკვლეული ადგილია, შესაბამისად დიდია შანსი, რომ ძუძუმწოვართა კონკრეტული სახეობები იქ ვერც შევამჩნიეთ", - განაცხადა ფიშერმა.